Өмнөговь аймгийн удирдлагууд нутаг нуг дов толгодын үзэл гаргасан талаар Баянхонгорын тэмээчид өгүүлж байна. Өнгөрөгч өдрүүдэд буюу энэ сарын 5-7-ны өдрүүдэд Өмнөговь аймагт дэлхийн дээд амжилтыг шинэчлэн тогтоох “Монгол тэмээ 999” арга хэмжээ боллоо. Энэхүү арга хэмжээний сүүлийн өдөр Өмнөговь аймгийн нутгийн удирдлагын ордны үүдэнд Баянхонгор аймгийн тэмээчид жагсаал хийлээ.

Учир нь 1000 тэмээ уралдуулах түүхэн үйл явдлын уралдаанд Баянхонгор аймгийн 100 гаруй тэмээг уралдуулахгүй, уралдаанаас хассан гэж тэд ийн эсэргүүцлээ илэрхийлжээ.

Өмнөговь аймгийн удирдлагуудын зүгээс дээрх асуудлыг тайлбарлахдаа энэхүү арга хэмжээ нь “Монгол тэмээ” гэж онцолсон бөгөөд тэмээний уралдааны техникийн зөвлөлгөөн дээр хавтгайн эрлийз тэмээ уралдуулахгүй гэдгийг сануулсан. Монгол тэмээгээ ялгаад зохион байгуулалтайгаар аваад ир гэсэн боловч бүгд оролцоно гэсэн учир Баянхонгорын тэмээг нийтэд нь хассан” хэмээн мэдэгдсэн аж.

Мөн тэдний мэдээлж буйгаар Өмнөговь аймгийн Гурвантэс, Ноён зэрэг баруун талын сумдаас хавтгайн эрлийз тэмээ ирсэн ч уралдаанд оролцоогүй гэдгийг зарласан юм. Харин Баянхонгор аймгийн тэмээчид Өмнөговь аймгийн удирдлагуудын тайлбарыг үгүйсгэж,Гурвантэс, Ноён зэрэг сумдын тэмээг уралдуулсан хэмээн баталж байлаа.

Учир мэдэх хүмүүсийн хэлж буйгаар хавтгайн эрлийз тэмээ нь бөх жижиг, хүзүү урт, хөл нь нарийхан, тачир үстэй байдаг гэнэ.

Ямартаа ч, Өмнөговь аймгийн удирдлагууд дов толгодын үзэл гаргаж, дэлхийн дээд амжилтыг шинэчлэн тогтоох арга хэмжээгээ зөвхөн өөрийн аймгийн тэмээчдийн нэрсийг гаргах гэж хүссэн бололтой хэмээн Хонгор нутгийн тэмээчид үзэж байна.

Б.Дэжид

Gereg.mn