Яриагаа шууд эхлэе. Танай намд яг юу болоод байна?

С.Ганбаатар дарга маань өөрөө “хэмжээлшгүй эрхт хаан” болохыг хүсч байх шиг байна. Өөрөө Ерөнхийлөгч болох гэж хэт улайрч байна. УИХ-д хэнийг нэр дэвшүүлэх зэрэг бүхий л асуудлаа ганцаараа шийдэхийг хүсч байна. Улс төрчийн хувьд алдаа гаргачихлаа. Маш олон дүрмээ зөрчсөн тушаал дээр гарын үсэг зурчихсан. Тэрүүндээ бантаад бүүр сүүлдээ хуульчид нь энэ дүрэм их муу хийгдсэн байна. Энэ дүрэм хүчингүй, Хариуцлагын Ерөнхий Хороо хүчингүй. Одоо даргынхаа шийдвэрийг дагаад л явъя гэдэг болсон. Уг нь манай дүрэм олон орны дүрмийг судалж хийгдсэн, эрх мэдлийг их сайн хуваарилсан. Нэг хүнээс хамааралгүй байхаар хийгдсэн дүрэм л дээ. Гэхдээ бид Намын Төв Хорооны хурлаа хийгээд, түүгээр удирдуулахгүй гэдгээ шийдчихсэн.

Тухайлбал яг хэнийг нэр дэвшүүлье гэсэн юм вэ?

Сайхансамбуу, Мянганбаяр, Сүхбат аврага зэрэг хүмүүсийн нэрс сонсогдсон. Мөн аль хэдийн ярьчихсан тойрогт шинээр хүн гаргаж ирээд, урьд нь ярьсан хүнийг болиул гэж шахдаг гэсэн. Хэлсэндээ л байх хэрэгтэй биз дээр? Эр хүмүүс чинь.

Энэ эрх нь хэнд байх ёстой юм вэ? Намын дарга юм бол түүнийгээ шийдэх нь зөв юм биш үү?

Энэ намыг уг нь Доржханд тэргүүтэй хэсэг нөхөд анх санаачлаад, хамаг байдаг хөрөнгөө зараад байгуулсан. 21 аймаг, 9 дүүрэгт намын хороог байгуулах бүх зардал, урсгал зардлыг эдгээр залуучууд гаргасан. Анхнаасаа Ганбаатар дарга та нар сэхээтнүүдээ нэгтгээд, бодлогоо аваад яв, намайг ашигла, би ер нь намын ажилд оролцохгүй гэж байсан. Өөрөө ч бид нар дээр ирж уулзахдаа ингэж хэлсэнийг энэ муу 2 дэлдэн сонссон. Даанч орж ирсэнийхээ дараа яриа нь өөрчлөгдсөн дөө. Мөнгө нь дууссан Доржхандын хэрэгцээ нь бас дууссан юм байлгүй дээ.

Хүмүүс Ганбаатар гуайг их худлаа ярьдаг гэх юм. Зарим нь бүүр донтой ч гэх юм. Үнэн юм уу?

Донтой эсэхийг нь ч би яаж мэдэх вэ дээ. Гэхдээ өнөөдрийн байдлаар бидний өмнө хэд хэдэн удаа яриа нь өөрчлөгдлөө. Төрөлхийн юм уу, улс төрийг удаан хийхээр ийм болчихдог юм уу бүү мэд. Дарга цагааныг 1000 удаа хар гэж олон ТВээр гараад хэлээд хар болгодог улс төрийн зэвсэгээ намынхаа журмын нөхдөд ашиглаж байгаа нь харамсалтай. Манай дарга төрөлхийн тэмцэгч хүн бололтой. Тэмцэх сэдэв нь дууссан юм болов уу даа мань мэт руугаа дайрсан нь харамсалтай. Дөнгөж өчигдөр бид нарыг намын тархи, надад байхгүй боловсролтой залуучууд гэж хөөргөж байснаа өнөөдөр биднийгээ бууны нохой, цагаан гартнууд гэж байгаа нь жаахан эргэлзээ төрүүлж байна. Намынхаа эв нэгдлийг хангаж чадахгүй байгаа хүнийг ямар улс төрч гэх вэ дээ. Зүгээр л тэмцэгч юм биш үү? Тэмцэгч хүн улсыг хөгжүүлэх үү? Тэмцэгч Ерөнхийлөгч болж болох уу? Ерөнхийлөгч болоод бас хэнтэй тэмцээд эхлэх бол гэж бодохоос айдас төрж байна. Уг нь хөгжсөн улсуудыг хараад байхад бодлогоо гаргаж, удирдсан нь эрдэмтэд буюу даргын хэлдэг “цагаан гартнууд” нь л юм шиг санагддаг. Гэтэл дарга маань эрдэмтэй, боловсролтой залуучуудаа хөөгөөд эхлэлээ. Боловсролын үнэ цэнийг ойлгохгүй л байх шиг. Бас дээр нь дандаа л өөрийг нь магтдаг хүмүүсээр өөрийгөө тойруулах дуртай юм шиг санагдсан. Өөрийх нь улаан фенүүд гэх үү дээ. Өөр бодолтой, шүүмжилдэг хүнд дургуй юм билээ. Энэ чигээрээ дарангуйлагч болчих вий дээ. Гэхдээ ард түмэн ойлгоно доо.

Одоо тэгээд ямар шийдэл байна?

17-ны өдөр намын Хариуцлагын Ерөнхий Хорооноос шийдвэр гарсан. Хариуцлагын Ерөнхий Хороо гэдэг нь улсаар бол Үндсэн хуулийн цэц юм аа даа. Намын Их Хурлаас сонгогдсон байгууллага. Энэ газраас дээш шийдвэр гаргагч байхгүй. Энэ шийдвэртээ намын даргыг дүрмээ зөрчсөн дүгнэлт гарчихсан. Мөн 18-ны орой Удирдах Зөвлөл хуралдаад энэ асуудлаа Намын Төв Хороогоор шийдэхээр болсон. Тэгэхлээр цаашид хэрхэхээ энэ хурлаар эцэслэнэ шийднэ.

Эцэст нь та өөрийгөө танилцуулна уу!

Ж. Лхагвасүрэн. Инженер, Намын Удирдах Зөвлөлийн гишүүн. Манай аав цэргийн хүн байдаг. Ихээхэн хатуу хүн байдаг. Нэр адил болоод ч тэр үү Залуу жанжин Ж. Лхагвасүрэн гуай шиг дайчин, эрэмгий хүн болох юмсан гэж багадаа мөрөөддөг байлаа. Цэргийн хүний айлд өссөн болоод ч тэр үү урвалтыг бүр үзэх яддаг. Бас эх орныхөө төлөө амиа өгөх ёстой гэсэн үзэл бас гэр бүлийн хүмүүжил болчихдог юм шиг санагддаг. Энэ улсыг аврахгүй бол болохгүй гэж хүн бүр ойлгож байгаа. 2012 онд ийм сонголт хийх гэж оролдсон. Харамсалтай нь сонголт буруу байсан бололтой. Хараад шүүмжлээд, тэвчээр алдаад, боссон ухаантай юм. Даанч нам маань бас дотроосоо ийм урагшгүй байдалд хүрчихлээ. Бидэнд бас буруу бий. Бид хэт их ялалтанд шунаж, амархан ялалт хүсч, Ганбаатар даргатай хамтрах шийдвэр гаргасан. Даргын нэр хүндийг ашиглая гэж бодсон. Дөт зам гэж байдаггүй юм байна. Удаан ч гэсэн бодлогоо зөв гаргаад, иргэдтэйгээ тулаад уулзах л ёстой байж. 10 жил зараад ч хамаагүй шунахгүй л ажиллах байж гэж гэмшиж байна.

Та дипломтой юу? Тоглож байна өө. Боловсролын тухай жаахан нэмээч.

Аан. 10 жилээ 23-т сурч байгаад, 1-р сургуулийн тооны ангийг төгссөн. Олимпиадаар их явдаг байлаа. Төгсөх жилээ Улсын Физикийн олимпиадад алт, Улсын Математикийн олимипадад хүрэл медаль аваад, МУИС-ийн Электроникт урилгаар орсон. Сурч байгаад төгсөлгүй 3-р курсээсээ Засгийн газрын тэтгэлгээр Япон руу явсан. Тэнд Токиогийн Их Сургуулийг бакалавр, магистр төгссөн. Удирдлагын академид бизнесийн удирдлагаар магистр төгссөн. Дарга бол Японд төссөн болохоор намайг аягүй бол Японы тагнуул гэх байлгүй. Манай сургууль энэ жил Дэлхийд 13-т жагссан байна лээ. Сүүлийн үед жил бүр л Нобелийн шагналтан төрж байгаа мундаг сургууль. Би энэ сургуулийн бакалаврт орсон анхны Монгол хүн гэдгээрээ ихэд бахархдаг. Хүн гадаад оронд очихоор Эх орноо ийм л болгочих юмсан гэж их бодогддог юм билээ. Хөгжлийн гол мөн чанар нь хүндээ л байдаг гэж ойлгосон. Монгол улсыг хөгжүүлье гэвэл Монгол хүнийг Дэлхийн түвшний боловсролтой л болгох хэрэгтэй. Тэгэхэд л аандаа тэр иргэд маань, хүүхдүүд маань өөрсдөө л улсаа хөгжүүлээд явчихна. Ямар улс болмоор байна? Тийм л боловсролын системтэй болох хэрэгтэй.

Эх сурвалж: Шуурхай.мн

Овог нэр: Жазагийн Лхагвасүрэн

Төрсөн он: 1974 ( 41 настай)

Гэр бүлийн байдал: Эхнэр, 2 хүүхэд.

• Боловсрол:
  • 1982 23-р дунд сургууль.
  • 1989 1-р дунд сургууль.
    • 1992 оны Улсын Физикийн Олимпиад 1-р байр.
    • 1992 оны Улсын Математикийн Олимпиад 3-р байр.
  • 1992 МУИС, Физикийн факультет, Электроникийн анги.
  • 1995 Осакагийн ГХДС-д хэлний бэлтгэл.
  • 1996 Токиогийн Их сургууль.
    • Bachelor of Science (Computer Science, Network )
  • 2000 Токиогийн Их сургууль.
    • Master of science (Computer Science, Security)
  • 2009 Удирдлагын академи.
    • Бизнесийн удирдлагын магистр.
  • 2010 ШУТИС, Холбоо мэдээллийн сургууль.
    • Докторантур. Сэдэв: ” Монгол улсын хөгжилд мэдэллийн технологийн нөлөөллийн судалгаа”.
  • Ажлын туршлага:
    • 2002 Япон, NRI(Nomura Research Institute) компани. System integrator
      • Oracle Platinum Master.
    • 2005 Монгол, Нимон СистемзХХК байгуулах: System integrator
    • 2006 Монгол, YokozunaNET ХХК байгуулах : ISP
    • 2015 Хөдөлмөрийн үндэсний намын намын байгуулалтын газрын дарга
  • Гадаад хэл: Япон, Англи, Орос
  • Давуу талууд: Ажлын ачаалал даана, удирдан зохион байгуулах чадвартай, логик сэтгэлгээтэй, судлах суралцах чадвартай.