“Мал дагавал ам тосдоно” гэдэг үг орчин үед “Нам дагавал ам тосдоно” болж хувирснаас болоод мөнгөтэй гэсэн хүн болгон намруу хошуурдаг болоод удаж байна. Намдаа мөнгө хандивласанаа бахархалтай нь аргагүй зарлаж, улс төрд хөл тавьдаг жишиг Монголын улс төрийн байх ёстой үзэгдэл мэт болсон.

УИХ-ын 2012 оны сонгуулиар бүх нам 35.7 тэрбум төгрөг зарцуулсныг Сонгуулийн ерөнхий хороо мэдээлсэн байдаг. Үүний 60 орчим хувь болох 21.3 тэрбум төгрөгийг Ардчилсан нам болон Ардын нам зарцуулжээ. Тодруулбал, Ардчилсан нам 11.2, МАН 10.1 тэрбум төгрөгийг УИХ-ын өнгөрсөн сонгуулийн үеэр зарсныг Сонгуулийн ерөнхий хорооны тайланд тусгажээ.

МАН-ын нүүр бардам санхүүжүүлэгчид

УИХ-ын гишүүн Н.Номтойбаяр саяхны нэгэн ярилцлагадаа намдаа хандив өгдөг талаараа “Нам биднээс мөнгө авдаг. Санхүүжилт олж ирэхийг хүсдэг. Бид мэдээж намынхаа гишүүний хувиар хандив өгдөг. Тухайлбал, “Алтан сарнай” чинь залуусын хандиваар л босдог шүү дээ” хэмээсэн. Түүнийг улс төрд орж ирэхээс өмнө “Ардын намын АТМ буюу бэлэн мөнгөний машин” гэсэн хошин ч гэмээр яриа улс төрийнхний хүрээнд гараад байсан нь үнэний ортой байсныг дээрх яриа баталж байгаа юм. Тэр бол МАН-ын нүүр бардам санхүүжүүлэгчдийн нэгд яах аргагүй орно. Түүнээс гадна олон хүн байгааг УИХ-ын гишүүн асан Ц.Шинэбаяр УИХ-ын 2012 оны сонгуулийн өмнөх нэгэн ярилцлагадаа дурьдсан байдаг. Тэрбээр “МАН-ын Ерөнхий нарийн бичгийн дарга асан У.Хүрэлсүх, МАК, НИК компани, УИХ-ын гишүүн Ш.Сайхансамбуу болон Б.Чойжилсүрэн, О.Содбилэг нар тус бүр нэг тэрбум төгрөг, Д.Дамба-Очир 500 сая төгрөг намдаа хандивласан” хэмээсэн байдаг. Гэхдээ энэ бүхнийг одоо болтол хэн ч шалгаагүй байдаг нь бүр сонирхолтой. Ил, цагаанд нь нэрлэчихээд байхад хэн ч тоохгүй байхад нэр нь ил гараагүй, нууц санхүүжүүлэгчид хэнээс ч, юунаас ч айх билээ. Тиймээс МАН-ын санхүүжүүлэгчдийг нүүр бардам гэхээс өөрөөр юу гэх вэ.

АН-ын нууцлаг хандивлагчид

Ардчилсан намынхан олон намын нэгдэл, олон фракцийн хуваагдал гэдэг утгаараа эв түнжин муутай ч хэн нь хэдэн төгрөг намдаа хандивласныг Ардын намынхан шиг ил цагаан хэлчихдэггүйгээрээ нууцлаг хандивлагчид нэр зүүх нь бий. Гэхдээ Ардчилсан нам Ардын намаас илүү хандивлагчидтай гэдгийг улс төрийн хүрээнийхэн бүгд л ярьцгаадаг. Ямартай ч Ардын намын Ерөнхий нарийн бичгийн дарга А.Мөнхбат саяхны нэгэн ярилцлагадаа “Ардчилсан намынхан өнгөрсөн сонгуулийн үеэр нэр дэвших эрхийг 50 сая төгрөгөөр худалдсан” гэсэн үгийг амнаасаа унагана билээ. Гэхдээ өнгөрсөн сонгуулийн үеэр Ардчилсан намаас нэр дэвшсэн зарим хүн 100 сая төгрөг хандивласан гэдгээ ч нуудаггүй юм билээ.

ХҮН-ын жагсаалтын үнэ

Саяхан байгуулагдсан ХҮН-ынхан хүртэл мөнгөний асуудалд орооцолдоод амжчихсан гээд бодохоор намын санхүүжилт гэдэг үнэхээр өргөн хүрээг хамарсан сэдэв гэдэг нь тодорхой болоод байгаа юм. Тус намын Ерөнхий нарийн бичгийн дарга асан Б.Доржханд гэгч намын нэрийн жагсаалтын 3 дугаарыг л гэхэд 5 тэрбум төгрөгт хүргэж зарсан талаар нь ХҮН-ын Нийслэлийн намын дарга болох Т.Бат-Оргил хэлсэн байдаг. Тэр ч бүү хэл намын жагсаалтын эхний байрыг 15 тэрбум төгрөгт хүргэсэн гэсэн мэдээлэл ч сүүлийн үед их гарах болсон. Тус намын Удирдах зөвлөлийн гишүүний эрхийг 50 сая төгрөгөөр худалдсан тухай эх сурвалж мэдээлж байсан гээд бодохоор энэ нам ч санхүүжилтийн асуудлыг “ах” нарынхаа адилаар зохицуулж байгаа нь илэрхий болоод байгаа юм. ХҮН-ын жагсаалт тэрбум, тэрбум төгрөгөөр үнэлэгдэж байна гээд бодохоор Ардчилсан нам болон Ардын намын жагсаалт хэдэн төгрөгөөр үнэлэгдэх нь таагаад байх зүйлгүй биз ээ.

МАХН-ын 50 мянган ам.долларын асуудал

МАХН-ын Ерөнхий нарийн бичгийн дарга, Эрүүл мэнд, спортын сайд асан Г.Шийлэгдамба намынхаа санхүүжилтэд зориулан 50 мянган ам.доллар буюу 100 сая төгрөгийн санхүүжилт босгосон байсан нь илэрч, дуулиан тарив. Үүнээс нь болоод түүнийг авлига авах замаар намдаа хандив өргөх гэлээ гэсэн үндэслэлээр АТГ-аас саатуулж, хориод амжсан. Харин батлан даалтад гарсныхаа дараа тэрбээр хууль зөрчин байж хэвлэлээр намын санхүүжилт босгох нь түвэгтэй байсан, дарамтанд байсан гэсэн утга бүхий зүйл ярьж, олны нүдийг бүлтийлгэж, чихийг дэлдийлгэж орхив. Батлан даалтад байгаа хэн нэгэн этгээд хэвлэл мэдээллийн хэрэгслээр мөрдөн байцаалтын нууцыг задруулж, намд хандив өргөгчдийг чичрүүлж орхив.

Бусад намын “Г.Шийлэгдамба” нарыг яах вэ

МАХН-ын генсек асан Г.Шийлэгдамба 100 сая төгрөгийн хандив намдаа өгөх гэж байгаад асуудалд орсон. Гэтэл түүнээс ч илүү тэрбум, тэрбумаар нь намдаа хандив өргөдөг гэгдээг, нэр устайгаа зарлагдаад байгаа нөхөд ямар ч гэм хийгээгүй юм шиг л байгаагаас үүдэн “бусад намын Г.Шийлэгдамба нарыг яах гэж байна вэ” гэсэн асуулт урган гарах нь зайлшгүй юм.

У.Жанцан

Эх сурвалж: Цензургүй.мн