Эрчим хүчний яам, Эрчим хүчний хөгжлийн төв хамтран зохион байгуулж байгаа “Energy Mongolia-2013” олон улсын чуулга уулзалт өнөөдөр эхэлнэ.

Энэхүү чуулга уулзалтын зорилго нь Монголд хэрэгжиж байгаа мөн хэрэгжүүлэхээр төлөвлөж байгаа эрчим хүчний төсөл, хөтөлбөрүүдэд гадаад дотоодын хөрөнгө оруулагчдыг татах, шинэ дэвшилтэт байгаль орчинд ээлтэй технологи, бүтээгдэхүүн үйлчилгээг танилцуулах,  мэдээлэл солилцох явдал юм. Маргааш 09.00 цагт “Blue Sky”-ийн хурлын танхимд чуулганы нээлт болох бөгөөд Мишээл Экспо төвд 15.00 цагаас “Energy Mongolia-2013” Олон улсын хурал, үзэсгэлэн дэлгэгдэх юм байна.

Монгол Улсын эдийн засаг хурдацтай хөгжиж, эрчим хүчний өсөн нэмэгдэх хэрэгцээг хангахад эрчим хүчний салбарын хөгжлийн бодлогыг тодорхойлж, томоохон төсөл, хөтөлбөр хэрэгжүүлэх хэрэгтэй байгаа билээ. Тэгээд ч эрчим хүчний салбарт хэд хэдэн томоохон төсөл хэрэгжүүлэхээр болсон. Тухайлбал, V цахилгааны станц, Улаанбаатар хотын зүүн хэсгийн хэрэгцээг хангах зорилгоор “Амгалан-15” 300 мВт-ын станц, Таван толгойн нүүрсний уурхайд түшиглэсэн 450 мВт-ын хүчин чадалтай цахилгаан станц зэрэг олон станцууд барьж байгаа.

Цаашдаа бид эрчим хүч экспортлогч улс болох зорилт тавьчихаад байгаа. Энэ үед олон улсын эрчим хүчний салбарынхантай чуулж, туршлага судлах, хамтран ажиллах талаар хэлэлцэж буй энэхүү чуулга уулзалтад Монгол Улсын төрөөс өндөр ач холбогдол өгч байгаа юм.

Эх сурвалж: Шуурхай.мн