БХБ ын сайд З.Баянсэлэнгэ өнөөдөр салбарынхаа ахмадуудад хүндэтгэл үзүүллээ. Салбарын түүхийг бичилцсэн буурлуудынхаа үнэтэй сургааль сургамжийг сонсон халуун дулаан яриа өрнүүлсэн тэрээр “ Барилгын салбарын фундаментыг тавилцсан амьдралынхаа бүхий л хугацааг салбартаа зориулсан та нарынхаа гавьяа зүтгэлийг үнэлж баршгүй юмаа гээд салбарын ажлыг төдийлөн мэдэхгүй ч та нар маань байгаа учраас би айхгүй байна, урам зоригтой байгаа” хэмээн хэлж ахмадуудаа баярлуулсан юм. Мөн ажиллах хугацаа богино хэдий ч олон ажлыг хийхээр төлөвлөж байгаагаа дуулгаад “ахмадуудаасаа сурах сонсох зүйл их байна, та нар маань зааж зөвлөж ташуур өгч байгаарай” хэмээн хүслээ. З.Баянсэлэнгэ сайд салбарын ахмадуудаа шагнаж баярлуулсан бол ахмадууд шинэ сайддаа баяр хүргэн үнсэж урмаар шагнасан юм. Энгэр дүүрэн одон тэмдгээ зүүсэн барилгын салбарын буурлууд салбарынхаа анхны эмэгтэй сайдтай зургаа татуулцгаах гэж хэрдээ л хөл хөдөлгөөн болов. Урилга хүлээн авч хүрэлцэн ирсэн ахмад буурлууддаа Баянсэлэнгэ сайд талархлаа илэрхийлээд “Та нөхдөөрөө уламжлуулан салбарынхаа мянга мянган буурлууддаа ахмадын баярын өдрийн мэндийг дэвшүүлж ерөөл бүхний дээдийг хүсэн ерөөе” гэлээ.