Улсын Драмын Эрдмийн театр өөрийн барилгаа шинэчлэн засварлах, техник тоног төхөөрөмжөө сайжруулах зорилгоор төсөл хэрэгжүүлж байна. Тус театр үйл ажиллагаагаа явуулж байгаа одоогийн барилга нь 1950-иад оны сүүлээр монголын ард түмний хандиваар “Залуучуудын ордон” нэртэйгээр анх байгуулагджээ. УДЭТ нь тус барилгад 1963 оноос хойш дорвитой засвар, шинэчлэл хийгдээгүй бол тайзны тоног төхөөрөмж, гэрэлтүүлэгээ тэд хэдэн жилийн өмнө 70 хувьтай шинэчлэжээ.

Дээрх төсөл одоогоор эхлэлийн шатандаа байгаа бөгөөд эхний ээлжинд бүрэн засвар хийхэд хэдий хэрийн хөрөнгө мөнгө хэрэгтэйг судлан тогтоож, улмаар мөнгө босгох ажил эхлэх юм байна. Энэ төслийн гүйцэтгэгчээр “Супер барилга” компани ажиллах бол “Олуулаа” төрийн бус байгууллага хөрөнгө мөнгийг нь босгох ажил дээр туслахаар болжээ. Харин УДЭТ-аас энэхүү ажлын эхлэл болгож гурван удаагийн хандивийн тоглолт зохион байгуулахаар төлөвлөж, өчигдөр хоёр дахь удаагийн тоглолтоо “Тэнгэрийн хүү” жүжгээр хийлээ.