Мэргэжлийн сүмогийн дээд зиндаанд хамгийн сүүлд 2006 оны нэгдүгээр сард япон бөх түрүүлж байснаас хойш 34 башё өнгөрчээ. Бараг үлгэр болох шахсан тэр цагт хийгүй, нягт барилдаанаараа шагшигдаж байсан озэки Точиазүма Эзэн хааны цомыг гардсан билээ. Өөрөөр хэлбэл, сүмогийн ордонд байрлуулдаг түрүү бөхчүүдийн хөрөг дунд япон бөхийн зураг байхгүй болох нь. Жилд зохиогддог зургаан тэмцээний Токиод болдог башё бүрийн эхэнд өмнөх хоёр тэмцээнийх нь ялагчийн хөргийг залдаг ба ирэх оны анхны тэмцээнээр Хакүхо аваргын хоёр хөрөг япончуудын сүүлчийн төлөөлөл Точиазүмагийн зургийг шахах юм. Отгон ёкозүнагийн бүх түрүү сүүлийн 32 тэмцээний дотор байгаа учир ордон дахь хөргүүдийн гуравны хоёр нь түүнийх болох нь.