Нарны гүүрний баруун урд талд баригдаж байгаа “River stone” орон сууцны хорооллын барилга дээр ажиллаж байсан гурван залуу  өчигдөр өглөөний 11.00 цагийн үед арван давхар барилгын найман давхраас унаж, нас барсан харамсалтай хэрэг гарсан байна. Тус орон сууцны хорооллыг “S DEVELOPMENT” ХХК-ийн захиалгаар “Бо Бэ констракшн” гүйцэтгэж байсан ба хөдөлмөр хамгааллын ямар ч дүрэм журам тэнд мөрдөгддөггүй байсан талаар эх сурвалж хэлж буй юм. Хэрэг гарах үед хохирогчид барилгын гадна талын өнгөлгөөний засварын ажил хийн, дүүжин шатаар явж байсан бөгөөд шатны бэхэлгээ тасарч доош унасан байна.

Тэдний хоёр нь газар дээрээ нас барсан бол нэг нь ГССҮТ-д очсон ч бэртлээ даагаагүй өнгөрчээ. Хохирогчдын нэг нь 23 настай О гэгч залуу байсан бол нөгөө хоёр нь ЕБС-ийн сурагч байсан талаар эх сурвалж хэлсэн юм. Энэ талаар ЦЕГ-ын албаны эх сурвалжаас тодруулахад “Тийм хэрэг гарсан нь үнэн. Хэргийг Хан-Уул дүүргийн цагдаагийн хэлтэс шалгаж байна” хэмээлээ.