Монгол Улсын Ерөнхий­лөгч асан Н.Энхбаярын шадар туслахаар ажиллаж байсан Б.Тулгыг энэ 22-ны орой УМБГ-ын ажилтнууд барив­чилжээ.Б.Тулга нь Ерөн­хийлөгч Н.Энх­баярын бүрэн эрхийг дуус­сан 2009 он хүртэл түүний ша­дар туслахаар ажил­лаж байсан бөгөөд дараа нь АНУ-ын Нью-Йорк хотод Эдийн засгийн их сургуульд суралцан, магистрын зэрэг хамгаалаад эх орондоо ирсэн гэнэ. Түүнийг харьж ирээд хэдхэн хонож байхад ийм явдал болсон байна. 15.00 цагийн үед УМБГ-ын ажилтнууд түүнийг албадан саатуулах гэхэд Б.Тул­га зөв­шөөрөлгүй, эхлээд өмгөө­лөгч­дөө хандана гэдгээ мэдэгд­сэн ч цагдаа нар хүч хэрэглэн хувцас хунарыг нь урсан талаар өмгөөлөгч О.Баасанхүү хэлж байв. Өмгөөлөгч нь түүнтэй уул­захаар УМБГ дээр TY-9 телевизийн сэтгүүлчидтэй очиход Б.Тулгын хаана байгаа талаар тоймтой хариу өгөхгүй, баривчилсан хүмүүсийн утасны дугаарыг нь өгөхийг хүсэхэд няцаасан байна. Эх сурвалжийн мэ­дээлснээр Б.Тулгад ямар нэг гэм буруугүй харин түүний төрсөн ах Б.Хуягийг Д.Сүх­баатарын нэрэмжит Хэв­лэх үйлдвэрийн хууль бус хувьч­лалд оролцсон хэмээн хардаж байгаа гэнэ.

Мөн энэ хэрэгт Ерөнхий­лөгч асан, МАХН-ын дарга Н.Энхбаярыг буруутган АТГ-т өгч, ажлын хэсэг байгуулсан гэж байгаа. Энэ талаар ЦЕГ-ын Хэвлэл мэдээллийн албанаас лавлахад «Б.Тулгыг АТГ-аас шалгаж бай­гаа» гэсэн товчхон хариу өгсөн бол харин АТГ-ын хэвлэл мэдээллийн ажилтан «УМБГ болон АТГ-ын хамтарсан ажлын хэсэг үүнийг хариуцаж байгаа, өөр ямар нэг мэдээлэл өгөх боломжгүй» хэмээн хариу өглөө.

С.Амар

Эх сурвалж: “Монцамэ”