Гадаад харилцааны яамны Төрийн нарийн бичгийн дарга Г.Цогтсайхан Олон улсын шилжих хөдөлгөөний байгууллагын Монгол дахь салбарын захирал ноён Лилжерт Перийг  өнөөдөр хүлээн авч уулзав. Уулзалтын үеэр Шилжих хөдөлгөөнийг удирдах Монгол Улсын чадавхийг бэхжүүлэх, иргэдийг өөрийн хүсэлтээр эх орондоо эргэн суурьшихад нь туслах болон хүн худалдаалах гэмт хэргийн хохирогчийг хамгаалан дэмжих, чадавхийг бэхжүүлэх асуудлаар санал солилцов. Олон улсын шилжих хөдөлгөөний байгууллагаас дипломат болон консулын албаны хэрэглээнд зориулан гаргасан “Хүн худалдаалах гэмт хэргийн хохирогчдод хэрхэн туслах, хамгаалах тухай Гарын авлага”-ыг уулзалтын үеэр Консулын газрын удирдлагад гардууллаа хэмээн ГХЯ-наас мэдээллээ.