Монголын Залуучуудын Холбоо жил бүр Үндэсний их баяр наадмаар тав давж улсын начны болзол хангасан хамгийн залуу начинд Хан хөхийн угшлын хурдан удмын зээрд даага бэлэглэдэг сайхан уламжлалтай билээ. Анх 1994 онд Монгол Улсын аварга Д.Сумъяабазар начин цолны болзол хангаад энэ шагналыг хүртэж байсан бол энэ жилийн хувьд Увс аймгийн харъяат МУ-ын алдарт уяач Цэнд-Аюушийн галын хурдан удмын зээрд даагыг 20 дах залуу начинд бэлэглэж байгаа юм байна. Тус даагыг хамгийн залуу начинаар тодорсон Увс аймгийн харьяат, Увс нуур дэвжээний бөх Т.Баасанхүүд Монголын залуучуудын холбооны Ерөнхийлөгч А.Мөнхбат гардууллаа. Т.Баасанхүү нь 1989 онд төрсөн дөнгөж 24 настай залуу бөх юм. Түүнийг Монгол хүлгийн босоо хийморь тэтгэх болтугай.

MЗХ