Төсвийн байнгын хороо төсвийн тодотголын эцсийн хэлэлцүүлгийг хийх үеэр байнгын хорооны санал дүгнэлтийг нэгдсэн алдаанд уншиж танилцуулах гишүүн олдсонгүй.

Байнгын хорооны дарга Д.Хаянхярваа арга ядахдаа, “Ш.Сайхансамбуу, ганц удаа уншчих” гэхэд “Үгүй, би маргааш хөдөө явна” гэв.

Харин байнгын хорооны дарга нь “Индэрт гарчихсан юм уншиж байхыг чинь хөдөөгийнхөн харвал “Манай гишүүн мундаг илтгэл тавьж байна даа” гэж бодно шүү дээ” гээд бушуухан шиг алх цохиод “Одоо гүйцээ, Ш.Сайхансамбуу. Чи унш” гэсэн юм.

Ер нь гишүүд байнгын хорооны санал дүгнэлтийг нэгдсэн хуралдаанд танилцуулахдаа баахан халширч хойш суудаг. Энэ нь илтгэгч гишүүнээс асуух асуултад хариулж чадахгүй байх вий гэж айж болгоомжилдогтой нь холбоотой юм шиг. Уг нь зөв, буруу нь хамаагүй асуултад нь хариулж, зурагтаар гараад байвал эрхэм гишүүдэд тойргийнхноосоо авах оноо нэмэгдэхэд нэмэртэй юм даа.

Б.Номин

Эх сурвалж: “монголын үнэн”