Улаанбаатар-Хонконгийн чиглэлд өнгөрсөн ням гаригт хөөрсөн МИАТ-ийн онгоц унах дөхсөн талаарх  мэдээлэл бидэнд ирсэн юм. Тухайн онгоцонд зорчиж явсан иргэн Ч.Бат-Оргил “Онгоц Хонконгийн нисэх буудалд буухаасаа өмнө өндрөө алдаж, зорчигчид багагүй сандралдсан. Бид гэр бүлээрээ онгоцонд зорчиж явсныг хэлэх үү, их айдастай газардлаа. Чухам юу болсныг тодруулах гэсэн боловч онгоцны экипажийнхан тоймтой хариулт өгсөнгүй”  гэв. Эл мэдээллийг МИАТ компанийн хэвлэлийн ажилтан Л.Ундралаас тодруулахад “Энэ сарын 18-ны өдөр МИАТ-ийн  Улаанбаатар-Хонконгийн чиглэлийн нисэх онгоц  өглөөний 07.40 цагт хөөрсөн, Хонконгт тогтсон цагаасаа 22 минутаар хоцорч газардсан. Онгоцонд ямар нэгэн саатал гараагүй. Онгоц агаарын урсгалын нөлөөгөөс болж чичрэх, донслох үе гардаг” хэмээсэн юм.