“Universe Best Song`s” уралдааны шүүгчээр энэ удаа продюссер Р.Рагу, ая зохиогч Б.Долгион нар уламжлал ёсоор ажиллаж байгаа бол энэ жил Буриадын Ардын жүжигчин, дуучин Б.Амархүү урилгаар шүүгчээр ажиллаж байгаа. Уралдаанд оролцогч залуус болон үзэгчид Б.Амархүүд тун сэтгэл хангалуун байгаа гэнэ. Тэр дуучин болох хүсэлтэй залуусыг сайн муу сайхан муухай гэж шүүмжлэхээсээ өмнө хоолойн дасгалыг ингэж хий, дууныхаа өнгийг тэгж ав гэхчлэн мэргэжлийн талын зөвлөгөөг нөгөө хоёроосоо илүү өгч, залуусын хайрыг татаж эхэлжээ.

Өмнө нь УГЖ дуучин Т.Ариунаа шүүгчээр ажиллаж байсан ч Б.Амархүү түүний дэргэд хамаагүй дээр юм байна гэж үзэгчид ам сайтай байна лээ. Харин “Гурван охин” хамтлагийн дуучин Ану, “Киви” хамтлагийн ахлагч Ука нарыг залуу дуучдыг шүүлцэхэд арай ч эртдэнэ ээ гэцгээж байна. Тэд шалгуулахаар орж ирсэн хүүхдүүдэд урам дэмжлэг өгөх нь бүү хэл шоолж инээлдэн, үзэгчдийн дургүйг хүргэж байгаа гэнэ.