УИХ-ын гишүүд заримдаа бага ангийн сурагчид шиг аашлах нь энүүхэнд. УИХ-ын чуулганы өчигдрийн нэгдсэн хуралданы үеэр эрхэм гишүүн Су.Батболд гэнэт тунирхав. Ойролцоо суудаг гишүүн Д.Оюунхорол түүнийг ажил хийлгэхгүй “дарамтлаад” хэцүү байна гэнэ. Гэнэтхэн л Су.Батболд гишүүн “Энэ чинь болохгүй байна” хэмээн УИХ-ын дарга руу харж, бүр ширээгээ хэд хэд алгадаад авав. Харин нөгөө талын жигүүрээс Л.Гүндалай гишүүн “Чи яагаад эмэгтэй хүн зодоод байгаа юм” хэмээн Су.Батболд гишүүнийг загналаа.

УИХ-ын дарга тунирхуу гишүүддээ хариу өгөхгүй болохоор Су.Батболд гишүүн хавтсаа сугавчлан танхимаас гарч одов. Д.Оюунхорол гишүүн ч араас нь гайхан харсаар хоцорсон. Гишүүд юунаас болж ийнхүү аяглацгаасан нь тодорхой бус үлдсэн юм. Тэдний яриа микрофоноос хол, “орон нутгийн” шинжтэй болж өнгөрсөн хэрэг.