Замын цагдаагийн албанд энэ сарын 2-нд буюу өчигдөр нийт 322 дуудлага ирснээс зам тээврийн ослын 240 дуудлага бүртгэгдсэн байна. Үүнээс гэмт хэргийн шинжтэй гомдол мэдээлэл долоо бүртгэгдэж, долоон хүн хүнд хөнгөн гэмтсэн байна. Зам тээврийн осолд сургуулийн насны нэг хүүхэд өртсөн. Ослын шалтгаан, хэлбэрээс авч үзвэл согтууруулах ундааны зүйл хэрэглэсэн үедээ хөдөлгөөнд оролцсон жолооч нэг, явган зорчигч хоёр бүртгэгджээ.

Замын цагдаагийн алба хаагчид гудамж замд хийсэн хяналт шалгалтаар согтууруулах ундааны зүйл хэрэглэсэн үедээ тээврийн хэрэгсэл жолоодож явсан 38 жолоочийг илрүүлэн саатуулж гарч болзошгүй осол хэргээс урьдчилан сэргийлж ажиласан байна. Тодруулбал, СХД-ийн нутаг Нарангийн голын эцсийн буудлын замд амины H.Verna маркийн автомашины жолооч С нь согтууруулах ундааны зүйл хэрэглэсэн үедээ тээврийн хэрэгсэл жолоодон, явган зорчигч Б-г мөргөж гэмтээгээд хэргийн газрыг орхиж хэргийг СХДЗЦХ-ийн зохицуулагч а/х Энх-Амгалан олж илрүүлжээ.