ВАШИНГТОН. /VOA/. Саудын Арабын Засгийн газрыг шүүхэд өгөх эрхийг 9 дүгээр сарын 11-нд болсон халдлагын үеэр амиа алдсан хүмүүсийн гэр бүлийнхэнд олгох тухай хуульд АНУ-ын Ерөнхийлөгч Барак Обама хориг тавьлаа.

Ерөнхийлөгч Барак Обама өчигдөр “Террорист үйл ажиллагааг ивээн тэтгэгчидтэй тэмцэх хууль”-д хориг тавиад, энэ хууль АНУ болон Саудын Араб хоорондын харилцаанд сэв суулгаж магадгүй гэж мэдэгджээ.

Энэ хууль батлагдсанаар террорист халдлагын улмаас хохирол амссан АНУ-ын иргэд халдлагад оролцсон гадны орнуудаас нөхөн төлбөр нэхэмжлэх эрхтэй болох юм. Уг хуулийн төслийг Конгресс аль хэдийн баталсан байна.

9 дүгээр сарын 11-ны халдлагыг төлөвлөн зохион байгуулсан Усама Бин Ладен болон нисэх онгоцыг барьцаалсан хүмүүсийн ихэнх нь Саудын Арабын иргэд байсан байна. Зарим хүмүүс АНУ уг халдлагын хариуцлагыг Саудын Арабын Засгийн газарт тохох зорилготой байна гэж үзжээ.

Харин Конгрессын гишүүд Обамагийн хоригийг цуцлах зорилготой байна. Сенат болон Төлөөлөгчдийн танхимын гишүүдийн гуравны хоёр нь Ерөнхийлөгчийн хоригийг цуцлах санал өгвөл хууль хэрэгжиж эхлэх юм.

Д.Нямтулга

montsame.mn