Энэ сарын 21-ний өдөр Дархан-Уул аймгийн орон сууцанд хий дэлбэрч, оршин суугчдыг нүүлгэн шил­жүү­лэхэд хүрсэн билээ.

Энэхүү дэлбэрэлтийн үеэр түлэгдсэн гурван иргэний хоёрынх нь биеийн байдал хүнд байгаа тул ГССҮТ-ийн харьяа Түлэнхийн төвд хэвтэн эмчлүүлж байна.

Түлэгдсэн иргэдийн нэг бо­лох Н.Жаргалсайхан нь 48 настай Дархан-Уул аймгийн Ана­гаахын коллежид баг­шилдаг аж.

23 настай Лхагважаргал нь Дархан-Уул аймгийн Ана­гаахын коллежийн хоёр­ду­гаар дамжааны оюу­тан гэнэ. Нэг нутгийнх учраас Н.Жар­галсайхан нь Лхаг­ва­жарга­лыг гэртээ байлгадаг байжээ.

Манай сурвалжлах баг хийд түлэгдсэн өвчтөнүүдийн биеийн байдал ямар байгаа та­лаар сурвалжлахаар ГССҮТ-ийн харьяа Түлэн­хийн төвийг зорьсон юм. Бид өвч­тө­нүүдийн хэвтэж буй Тү­лэнхийн төвийн 15 ду­гаар тасагт очиход эмч нар тэдэнд эмчилгээ хийж байв. Н.Жаргалсайхан, Лхагва­жар­гал нарын ил харагдах бие нь нэлэнхүйдээ түлэгдэж, та­нигдахын аргагүй бол­жээ. Лхаг­важаргалыг бодвол Н.Жаргалсайханы биеийн байдал нь арай гайгүй байсан юм. Харин Лхагважаргал нь дэл­бэрэлт болсон өдрөөс хойш өчигдрийг хүртэл ухаан ороогүй байлаа.

Хийн дэлбэрэлтийн та­лаар Н.Жаргалсайханаас за­рим зүйлийг тодруулах гэсэн боловч биеийн байдал нь хүнд байгаа болохоор яриа өгөх боломжгүй гэлээ.

Харин тэднийг Н.Жар­гал­сай­ханы төрсөн дүү Н.Эр­дэнэсувд гэх эмэгтэй сахиж байв. Тэрбээр Дархан-Уул аймгийн Нэгдсэн эм­нэл­гийн хагалгааны тасагт су­ви­лагч хийдэг аж. Дэлбэрэлт болсон өдөр Н.Эрдэнэсувд жижүүрт гарч байжээ.

Болсон хэргийн талаар Н.Жаргалсайханы дүү Н.Эрдэнэсувдаас тодрууллаа.

Бүх бие нь хийд норж, гал авалцсан байсан

-Дэлбэрэлтийн талаар тод­руулаач. Тухайн үед яг юу болсон юм бол?

-Их аюултай зүйл бол­сон. Би тэр өдөр ажил дээ­рээ байсан. Оройн 21:15 цагт гэнэт хүчтэй чимээ гарч, газар доргисон. Газар хө­дөлж байна л гэж бодсон. Удал­гүй манай эмнэлэгт дууд­лага ирсэн. Гэтэл замын цаа­на байх манай эгчийнд дэл­бэрэлт болчихсон байсан. Цонх­нуудаас нь гал гарч бай­гаа нь үнэхээр аймшигтай ха­рагдаж байсан. Ийм аюул­тай байдалд хүний амь эрс­дээгүйд л баярлаж байна.

-Хийг буруу холбосноос болж дэлбэрэлт болсон гээд байгаа?

-Энэ бол ташаа мэдээлэл. Манай эгчийн нөхөр нь тэр өдөр 15:45 цагт “Даш­ваан­жил” компаниас таван литрийн хийн баллонтой хоёр ширхэг хий авсан юм билээ. Тухайн үед “Дашваанжил” компани машин байхгүй гээд хүргэж өгөөгүй гэсэн. Тэ­гээд өөрсдөө гэртээ авч ирээд нэгийг нь хэрэглэж, нө­гөөг нь нөөцөлсөн гэсэн. Угаа­саа манай эгчийнх байнга хоё­роор нь авдаг. Олон жил хий хэрэглэсэн хүмүүс. Бу­руу холбоно гэж байхгүй. Тэ­гээд ч хэрэглэж байсан хий нь биш нөөцөлсөн нь дэл­бэрсэн.

-Паарны хажууд тавьсан бай­сан гэсэн мэдээлэл га­раад байгаа шүү дээ?

-Манай эгчийнх олон жил хий хэрэглэж байгаа. Тэр зэргийн юмыг мэдэлгүй яах вэ. Нөөцөлсөн хийгээ ши­рээн доогуур сэрүүн газар хад­галсан юм билээ. Гэтэл тэндээс хий алдаж, дэлбэрэлт болсон гэсэн.

-Нөөцөлсөн хий дэлбэрсэн гэдгийг яаж мэд­сэн юм бол?

-Гэнэт ямар нэгэн юм дэлбэрсэн юм билээ. Гэ­тэл тэдний бүх бие нь нэлэн­хүйдээ ус болсон байсан гэ­сэн. Харин холбосон хий нь хэвийн байсан юм билээ. Тэ­гээд гэнэт л гал авалцаж, дэл­бэрсэн байгаа юм.

-“Дашваанжил” компа­ниас эмчилгээний зардал өгч байгаа юу?

-Үгүй. Нэг ажилтан нь ирээд явсан. Биеийн бай­дал нь ямар байна гэж асуу­чи­хаад л явчихсан. Эмчил­гээний зардал өгөөгүй. Ер нь “Дашваанжил” ком­пани бид­нийг буруут­гасан. Өөрс­дийн­хөө хариуцла­гагагүй байд­лаас болж ийм зүйл гар­гаснаа үгүйсгэж байгаа.

-Одоогоор өвчтөнүүдийн биеийн байдал ямар байна вэ?

-Хүндхэн байна. Хийд түлэгдэх илүү аюултай юм байна. Улам цаашаа үрэвсдэг гэнэ. Одоогоор хэддүгээр зэргийн түлэгдэлтэй гэдгийг нь тогтоох боломжгүй бай­на. Ирсэн өдрөө бодвол Лхаг­важаргалын нүүрнийх нь хавдар татарч, нүд нь мэ­дэгдэж байна. Гэхдээ өөрийн гэ­сэн ухаангүй байгаа мөн амьс­галах эрхтний түлэг­дэл­тэй ч байж магадгүй гэсэн. Юу болохыг сайн мэдэхгүй юм.

-Эмчилгээ хэрхэн хийг­дэж байна вэ?

-Хийх ёстой бүх эмчилгээг хийж байгаа. Өдөрт 280 гаруй мянган төгрөгийн эм­чилгээ хийгдэж байна.

Н.Эрдэнэсувд ийн ярьж байлаа. Бид Түлэнхийн төвөөс гарч, “Дашваанжил” ком­панийг зорилоо. Тус ком­панийн хашаагаар ороход машин машинаар ачсан баллонтой хийг тээвэрлэж, үйл ажиллагаагаа хэвийн явуулж байв. Мөн удалгүй чир­гүүл дүүрэн баллон ачсан машин компанийн хашаа руу орсон юм. “Дашваанжил” компанийн захиралтай уул­зах гэсэн боловч туслах нь гэх эмэгтэй янз бүрийн шал­таг тоочиж байв. Сүүлдээ захирал нь бидэнтэй уулза­хаас эрс татгалзаж, Дархан явсан гэж хэлүүлсэн юм. Өөрсдийнхөө бурууг эрс үгүйсгэж, “Манай компани сайн. Ямар нэгэн буруу юм хийгээгүй” гэх зэргээр их л бардам хариулж байна лээ.

Дахиад айл дэлбэрч, эрдэ­нэт хүний амь насанд заналхийлэхийг таах арга­гүй. Энэ асуудлыг холбогдох албаныхан анхааралдаа авч, арга хэмжээ авахгүй бол хич­­нээн хүн амь насаараа хо­­хирч, Н.Жаргалсайхан, Лхаг­­важаргал нар шиг нүд хал­тирам болтлоо түлэгдэ­хийг тааж мэдэхгүй шүү дээ.