Зургаан сар үргэлжилсэн Үндэсний Супер Лигийн 2015-2016 оны Үндэсний аваргаар АЛЬЯНС ТЕХ ХАРЦАГА баг тодорлоо. Үндэсний Аваргын төлөөх цувралын зургаа дахь тоглолт Д.Содномзундуй агсны нэрэмжит Хандгайт дахь Үндэсний Сагсан Бөмбөгийн Ордонд өчигдөр /05.08/ болсон юм.

Харцага баг цувралыг 3:2 харьцаатай тэргүүлж байсан тул энэ өдөр ялалт байгуулахад аварга болох боломжтой байсан юм. Ширүүн өрсөлдөөнтэй тоглолтын эцэст Харцага баг ялалт байгуулж, цувралыг 4:2 болгон дуусгаснаар хоёр жил дараалан Үндэсний Аварга боллоо.

Харцага баг Үндэсний Аварга цолыг хүртэж, 40 сая төгрөг, Аваргын цом, Алтан медаль, Аваргын бөгж, малгай, цамц, цагаар шагнуулав.

Финалын цувралын үнэ цэнэтэй тоглогчоор ОУХМ Б.Одбаяр шалгарлаа. Тэрээр мэргэжлийн лигийн сүүлийн тоглолтоо өчигдөр хийж, албан ёсоор зодог тайлж буйгаа зарласан юм.

Түүнчлэн энэ улирлын финалын легионер MVP-гээр Альянс Тех Харцага багийн холбон тоглогч Карл Блейр тодорлоо.