Юуны өмнө насанд хүрээгүй, дунд сургуулийн сурагч байхдаа нэг ангийн хоёр сайн найзыгаа хулгай хийснийг дараа нь мэдсэн намайг гэмт хэрэг үйлдсэнийг нь мэдсээр байж цагдаад ирж хэлээгүй, иргэний үүргээ биелүүлээгүй хэмээх Эрүүгийн хуульд заасан зүйл ангиар хөөрхөн шийтгэж, өдөр бүр шахуу цагдаагийн үүдэнд сууж явдал чирэгдэл болж байснаа саналаа.

Үүнээс хэд дахин хүнд буюу нэг “ангийн” андыгаа хөнөөсөн хэргийг мэдсээр байж нуун дарагдуулж, иргэний үүргээ биелүүлээгүй Ерөнхийлөгч ямар хариуцлага хүлээх вэ. Нөгөө талаас ард түмний бэлэг тэмдэг болсон улсын Ерөнхийлөгч хүн амины хэргийг 17 дахь жилд нь нуун дарагдуулж байгаа нь ёс суртахуунтай зүйл вэ. Миний бие санах юм, 2009 оны Ерөнхийлөгчийн сонгуулийн өмнө /өөрсдийнх нь хэлдгээр гудамжинд лааз өшиглөж явсан/ Ц.Элбэгдорж “С.Зоригийн хэргийг 50 жилийн дараа илрүүлэх хуулийн төсөл” гээч юм яриад явж байсныг.

Үүнээс С.Зоригийн хэргийн захиалагчийг Ц.Элбэгдорж мэднэ гэдгийг харж болохоос гадна, түүнийг энэ хэрэгт холбоотой, мэднэ гэдгийг хэлдэг, үздэг хүмүүс бишгүйдээ бий. Нөгөө талаас “С.Зоригийн хэргийг 50 жилийн дараа илрүүлэх хуулийн төсөл” гээч зүйл нь зүгээр Ерөнхийлөгчийн сонгуульд өрсөлдөхийн тулд намын нөхөддөө хийсэн шантааж, айлган сүрдүүлэлт байсан юм. Тэгэхээр улстөрийн захиалгат аллага гэдэг нь тодорхой С.Зоригийн хэргийн баригдаагүй захиалагч /эсвэл захиалагчид/ одоо бүр, тэгэхдээ улстөрд байсаар байгааг илтгэнэ.

Магадгүй энэ хэргийн захиалагчдыг холоос биш ойроос, ингэхдээ “хамгийн аюултай газар хамгийн аюулгүй” хэмээх эртний сургаалийн дагуу нуугдаж буй хүн /эсвэл хүмүүс/-ийг “тэр газар” болсон улстөрөөс нь хайх хэрэгтэй болов уу. 2012 оны сонгуульд АН ялалт байгуулсны дараа тус намын зарим нөхөд С.Зоригийн хэрэг дээр ажиллаж байсан, энэ хэргийн талаар ихийг мэдэх хүмүүсийг гадаадаас нууцаар хайж эхэлсэн юм. С.Зоригийн хэргийн улмаас олон ч хүн гадагшаа зугтсан ба тэднийг олж авах гэсэн нь намынхаа томчуудыг шантаажлах гэсэн санаа болов уу. Юутай ч, Ерөнхийлөгч Ц.Элбэгдоржийг С.Зоригийн хэргийг мэдэж байгаа гэдгийг амтай болгон ярих болж түүнээс очиж асуу хэмээх болж.

Нөгөө талаас олон жил сонгуулийн шоу болсон С.Зоригийн хэрэг энэ удаад бараг илэрсэн аж. Д.Булган ч яриад эхэлсэн гэх бөгөөд энэ хэргийг жинхэнэ эзэн, холбогдогч нараас нь холдуулж, төөрөгдүүлэх ээлжит тархи угаалт яваад эхэлжээ. Эцэс сүүлдээ “Үхсэн хүн үг хэлдэггүй” гэдэг шиг “Эрдэнэт” үйлдвэрийн дарга агсан Ш.Отгонбилэгт тохохоор үзэв. Ямартай ч, хэрвээ Д.Булганыг Төв аймагт ганцаарчлан хорьсон асуудал улстөрийн томчуудын гар, хөлөөс хольж байж чадвал энэ хэрэг жинхэнээсээ илрэх юм. Харин тэр үед мэдсээр байж нуун дарагдуулж, иргэний үүргээ биелүүлээгүй хүмүүст ямар хариуцлага тооцох вэ.