Рок попын эмэгтэй дуучдын тэргүүн эгнээнд зогсч олны хайр хүндэтгэлийг хүүлээсэн дуучин бол поп дива МУГЖ Б.Сарантуяа гэхэд хэн ч маргахгүй байх. МУГЖ Б.Сарантуяа өнөөдрийг хүртэл ганц бие амьдарч байгаагаа “Би хайраас амархан уйддаг болохоор хэн нэгэнтэй удаан амьдарч чаддаггүй” хэмээн тайлбарладаг. Хөөрхөн хүүхдүүдээ өөрөө өсгөж хайраар дутаалгүй явахын зэрэгцээ чанартай  уран бүтээл хийхийг урьтал болгодог дайчин эмэгтэй. Үргэлж урлагийн алтан тайзаа хүндэтгэн фэнүүдийнхээ өмнө дэгжин үзэгддэг зууны манлай  дуучны минь талаар сүүлийн үед таагүй мэдээлэл цацагдах болов. Тэрээр түүнийг автын осолд орж зуурдаар таалал төгссөн тухай мэдээлэл цахим ертөнцөөр тарж шуугиан тарив. Бусдын нэр төрөөр мөнгө олох гэсэн увиаггүй нэгний буруу үйлдлээс болж олон нийтэд худлаа мэдээлэл цацсанд дуучин Б.Сарантуяа албан ёсоор тайлбар хийжээ. Тэрээр “Сонин юм шүү. Миний утас амралтгүй дугарлаа. Сэтгэл дотроо нэгийг бодоод, нөгөөг эргэцүүлэн амар мэндийг минь асууж, сэтгэл тавьсан бүх найз, дүү нартаа баярлалаа. Хорвоог орхих өдөр хэзээ нэгэн цагт ирэх боловч одоо л биш шүү. Би амьдрахыг маш ихээр хүсч байна. Үр хүүхдээ том болгож, ээжийнхээ хөлийг хучих, ах эгч нартаа түшиг болох юмсан л гэж бодож байна. Дуул, дуул бас дахин дуул гэж ард түмэн минь надад хэлдэг билээ. Хорвоо амгалан шүү, найзууд аа” хэмээв. Мөн энэхүү тайлбар хийхийн зэрэгцээ бичлэг хүртэл хийсэн юм.

Эх сурвалж: Шуурхай.мн