Сүүлийн үед хэвлэл мэдээллээр Хууль зүйн сайд асан Х.Тэмүүжинг хамаатнууддаа яамны нэрийн өмнөөс тушаал гаргуулж байр өгсөн гэх мэдээлэл цацагдах болсон. Харин үүнийг Х.Тэмүүжин эрс эсэргүүцэж “Байр олгосон хүмүүст миний таньдаг нэг л хүн байсан. Гэхдээ тэр бол хууль бус шийдвэр биш. Би энэ асуудлыг шалгадаг газарт нь шалгуулна” хэмээн тайлбарлаж байсан юм. Тэрээр эл хэргийг шалгуулахаар АТГ-т хандсан албан бичиг хүргүүлээд байсан. Тэгвэл АТГ уг хүсэлтийг шалгаж үзээд УИХ-ын гишүүн Х.Тэмүүжинд хариуг нь албан тоотоор хүргүүлжээ.

АТГ-аас хүргүүлсэн уг албан тоотод, “Таны хүсэлтэд дурдагдсан Хууль зүйн сайд байхдаа хамаатнууддаа хуурамч бичиг баримт бүрдүүлж, байр өгсөн. Үүгээрээ ашиг сонирхлын зөрчил гаргаж, хууль зөрчсөн” гэх асуудлын хувьд Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуульд заасан хориглолт хязгаарлалтыг зөрчсөн нөхцөл байдал тогтоогдоогүй болно” хэмээн бичиж ирүүлсэн байна.

Х.Тэмүүжин гишүүн энэ тухай жиргэхдээ “Хуурамч бичиг баримт үйлдэж хамаатнууддаа байр өгсөн гэх мэдээллийн эх сурвалжийг олох л үлдлээ” гэжээ.

Эх сурвалж: Шуурхай.мн