Хүн мэдлэггүй байж болно, гэхдээ мэдрэмжтэй байх хэрэгтэй гэдэг үг бий. Тэгвэл энэ үгийг АН-ын ерөнхий нарийн бичгийн даргын үүрэг гүйцэтгэгч Л.Эрхэмбаярт хэлмээр санагдав. Учир нь, тэрбээр Төрийн ордонд өчигдөр сэтгүүлчдийн хөх инээдийг хүргээд авав.

Тодруулбал, МАН-аас “Бид хамтдаа” сэдэвт үндэсний форумыг зохион байгуулж байгаа бөгөөд Дээд шүүхэд бүртгэлтэй 22 намыг урьснаас АН-аас бусдынх нь төлөөлөл ирсэн байлаа.

Төрийн эрх барьж байгаа АН яагаад энэ форумд оролцохгүй байгаа талаар асуухад намынх нь генсек “Бүх нам нийлж хуралдах нь түвэгтэй”-г хэлээд намууд Монгол Улсаа хөгжүүлэхийн тулд эвтэй байхыг уриалсан юм. Түүнчлэн монголчууд зөв зүйлийг гэхээсээ хар бараан асуудлыг дөвийлгэх дуртай болсон гээд “Улс орноо хөгжүүлэхийн тулд намуудын генсек, дарга нар Аглагийн хийд рүү очиж бясалгаж, сэтгэл санаагаа ариусгах ёстой” гэлээ.

Ийнхүү тэрбээр улс орноо хөгжүүлэхийн тулд олноороо нийлж бодлого, гарц ярихаасаа илүү ууланд очиж бясалгах нь чухал гэх хачин мэдрэмжгүй хариултыг өгөв. Түүгээр ч зогсохгүй улс орны бодлогын хэмжээний асуултын хариуд твиттер фэйсбүүкчид зам тавьсан гэх сайн мэдээг олонд түгээхгүй атлаа хов живийн мэдээг нэгэндээ их түгээж байгааг ч шүүмжлэн хэлэв.

Үндсэндээ тэрбээр сэтгүүлчийн асуултад тэс хөндлөн буюу маш мэдрэжмгүй хариулт өгч, хэвлэлийнхний нүдийг орой дээр нь гаргав. Мөн тэрбээр намынхаа удирдлагуудыг ч чимхээд авсан. Тодруулбал, тэрбээр “Төрийн эрх барьж байгаа намын удирдлагууд эдийн шуналаас хол байх ёстой бөгөөд энэ үед төр удирдах боломжтой болно” гэлээ.

Мөн нам дотроо фракц болж өөрсдийнхөө эдийн засаг, эрчим хүч энергийг үрж байна гэсэн юм. Үнэндээ манай улсад нам дотроо нам болон хуваагдаж, дотооддоо хэмлэлддэг нь АН. Тэд дотроо хэд хэдэн фракцад хуваагддаг бөгөөд тэдний хоорондын зөрчил намаа төдийгүй улс орны хөгжлийн гарцад хэзээд тээг саад болж ирснийг хэлэх хүн олон. Гэтэл намынх нь генсек ийнхүү удирдлагууддаа сэтгэл дундуур явдгаа илэрхийлчихлээ.