Дөрөвхөн настай охиноо хөнөөсөн хэрэгт буруутгагдаад буй Т.Цогт, талийгаач охины хойд эх Г.Маралмаа нарын хэргийг өчигдөр дэнсэллээ. Тэднийг охиныг биеэ хамгаалах чадваргүйг мэдсээр байж бүлэглэн онц хэрцгий аргаар санаатайгаар амь насанд нь хүрсэн гэж буруутган, тус бүрт нь 24 жилийн хорих ял оноосон юм. Шүүхийн шийдвэр гарсан даруйд Т.Цогт, Г.Маралмаа нарыг ШШГЕГ-ын харьяа цагдан хорих 461 дүгээр анги руу ачсан. Харин Т.Цогтод оноосон хорих ялын 5 жилийг гянданд, үлдсэн 19 жилийн чанга дэглэмтэй хорих ангид, Г.Маралмаагийн 24 жилийн хорих ялыг чанга дэглэмтэй хорих ангид эдлүүлэх шийдвэр гаргасан билээ.

Шүүхийн шийдвэрийн талаар Г.Маралмаагийн өмгөөлөгч Ц.Хувцагаанаас тодрууллаа.

-Шүүхийн шийдвэр гарлаа. Таны зүгээс тайлбар өгөх боломж байна уу?

-Шүүхийн шийдвэр эцэслэн гараагүй учраас ямар нэгэн тайлбар өгөх боломжгүй.

-Эцсийн шийдвэр биш гэхээр давж заалдах шатны шүүхэд хандана гэсэн үг үү?

-Тийм .

Шүүгдэгчдийн нэг нь л давж заалдах шатны шүүхэд гомдол гаргавал хэргийг бүхэлд нь хэлэлцдэг. Тэгэхээр Т.Цогт давж заалдах шатны шүүхэд хандахгүй байсан ч Г.Маралмаа гомдол гаргаж байгаа тул хэргийг Нийслэлийн давж заалдах шатны шүүхэд дахин хэлэлцэх юм.

Гэхдээ Г.Маралмаа нар шүүхийн тогтоолыг анхан шатны шүүхээс гардан авсны дараа 14 хоногийн дотор давж заалдах шатны шүүхэд гомдлоо хүргүүлнэ. Харин Нийслэлийн шүүхийн шийдвэр гарсны дараа тэднийг хорих ангид хуваарилах юм.

Г.Маралмаа хүүхэдтэйгээ хамт ялаа эдэлнэ

Г.Маралмаагийн хувьд өдгөө 9 сартай жирэмсэн. Түүний төрөх сүүлийн хугацаа энэ сарын 20 гэдгийг өмгөөлөгч Ц.Хувцагаан шүүх бүрэлдэхүүнд танилцуулж байсан. Хуулиндаа жирэмсэн эмэгтэй буюу гурав хүртэлх настай хүүхэдтэй эмэгтэйд оноосон ялыг хоёр жил хүртэлх хугацаагаар хойшлуулна гэж заасан байдаг ч Г.Маралмаагийн хувьд онц хүнд гэмт хэрэгт буруутгагдаж байгаа учраас түүнийг ялыг хойшлуулж, суллах ямар ч боломжгүй гэдгийг албаны эх сурвалж мэдээллээ. Тиймээс Г.Маралмаа нь хорих ангийн эмчийн хяналтан дор эмчлүүлж байгаад төрөх юм байна. Улмаар хүүхэдтэйгээ 1 жил хамт ял эдэлж байгаад, хүүхдийг нь 1 нас хүрэнгүүт Г.Маралмаагийн ар гэрт өгөх аж.

Эх сурвалж: Zaluu.com Б.Чимэг