Боловсрол, соёл, шинжлэх ухааны сайд шинэ оны босгон дээр тушаал  гарган  МУИС-ийн захирлыг  үүрэгт ажлаас нь чөлөөлсөн билээ.  Тодруулбал  өнгөрсөн оны 12-р сарын 30-ны өдөр Д.Галтбаярыг өөрийнх нь хүсэлтээр  “дэвшүүлэн  зайлуулж” улмаар  Р.Бат-Эрдэнийг 2015 оны 01 дүгээр сарын 01-ны өдрөөс эхлэн Монгол улсын  их сургуулийн  захирлын  үүрэгт  ажилд томилсон байдаг бөгөөд энэ нь хууль зөрчсөн тухай “Л.Гантөмөр сайдын хууль зөрчсөн нэгэн  үйлдэл ”  нийтлэлээр хүргэж байсан.

Өөрөөр хэлбэл, МУИС-ийн  захирлыг томилохдоо сонгон шалгаруулалт явуулах ёстой байхад салбарын сайд нь сонгон шалгаруулалт явуулалгүй  шууд томилсон.  Сонгон шалгаруулалт явуулаагүйгээс гадна захирлыг  томилоход шаардлагатай   АТГ,  Төрийн албаны зөвлөлийн  дүгнэлт, тодорхойлолтгүйгээр тушаал гаргасан нь  хууль бус үйлдэл байдаг.  Энэ нь БСШЖУ-ны сайд Л.Гантөмөр Боловсролын тухай хуулийн 28.1.12-ыг зөрчсөн байна.  Боловсролын тухай хуулийн 28.1.12.-д “Төрийн өмчит их сургууль, дээд сургууль, коллеж, боловсролын эрдэм шинжилгээ, арга зүйн байгууллага, боловсролын үнэлгээний байгууллага, албан бус боловсролын сургалт, судалгаа, арга зүйн байгууллага, төрийн өмчит олон улсын хөтөлбөрийн сургалттай ерөнхий боловсролын сургууль болон ерөнхий боловсролын лаборатори сургуулийн захирлыг сонгон шалгаруулалтын дүнг үндэслэн томилох, хуульд заасан үндэслэлээр чөлөөлөх” гэж заасан байдаг.

Тэгвэл сайдын энэхүү алдаатай үйлдлийг Төрийн албаны зөвлөл засаж залруулахаар МУИС-ийн захирлын сонгон шалгаруулалтыг зарлаад байгаа бөгөөд энэ талаар сайтдаа байршуулсан байна.

Гэхдээ анхаарал татаж байгаа нь наадмын өмнө асуудлыг шийдэх гэж байгаад оршино. Өөрөөр хэлбэл төрийн эрх баригчид “но”-той асуудлыг  олон нийтийн анхаарал өөр чигт хандуулсан үед  шийддэг.  Энэ удаад наадмын өмнө буюу 7-р сарын 9-10-ны өдөр асуудлыг шийдэх гэж байгаа нь МУИС-ийг хувьчлахад туслах нэгнийг тавих гэж байна гэсэн хардлагыг эрхгүй төрүүлж байгаа юм.  Тодруулбал,  МУИС-ийг  шинэчлэл нэрээр олон сургуулийг нь цөөлсөн байдаг. Улмаар тус сургуулийг хувьчлах асуудлыг хэлэлцэх эсэхийг  битүүний өдөр УИХ-аар хэлэлцэх нь зүйтэй гэж үзсэн байдаг.   Өдгөө  энэ асуудлыг УИХ-аар хэлэлцэх гэж байгаа нь МУИС-ийн захирлын сонгон шалгаруулалттай давхцаж байгаа юм.  Энэ нь МУИС-ийг шинэчлэл нэрээр “самарсан” нууц нөхөр ил гарах цаг ойртож байгааг илэрхийлж байна.

Харин энэ ажиллагаанд голлох үүрэг гүйцэтгэсэн Л.Гантөмөр сайд хууль зөрчсөн ч  ямар нэгэн хариуцлага хүлээхгүй өнгөрч  байна.  Түүний нэг удаагийн алдааг Төрийн албаны зөвлөл баларуулдлаа.  Цаашид хэчнээн алдааг нь  Төрийн албаны зөвлөл балруулдах бол… Бодох л асуудал.

А.Баярмаа

Эх сурвалж: www.dorgio.mn