“Глоб кредит” хадгаламж зээлийн хоршооны дарга асан Ж.Мэндбаяр саяхан суллагдаад байгаа. Тэрбээр суллагдсаныхаа дараа хэвлэлийнхэнд мэдээлэл хийж, өөрийнх нь 4 гаруй тэрбум төгрөгийн хөрөнгийг Шүүхийн шийдвэрийнхэн үнэгүйдүүлж, 1.2 тэрбум болгон худалдсаныг зүгээр өнгөрүүлэхгүй хэмээн мэдэгдэж буй юм. Үнэхээр түүний хөрөнгийг үнэгүйдүүлж худалдсан уу, хадгаламж зээлийн хоршооны хохирлыг өөрийнхөө объектыг худалдаад л барагдуулж чадахаар байхад түүнийг 10 жил хорьсон уу…Тийм бол, яагаад? “Глоб кредит” ХЗХ-ны дарга асан Ж.Мэндбаярын олон нийтэд хэлж буй мэдээллээс нь харахад өөрийн эрхгүй ийм асуулт гарч ирж байгаа юм. Уг асуултад хариулт олох үүднээс,  түүний хөрөнгийг үнэгүйдүүлсэн эсэхийг доорх баримтаар дэлгэн харуулъя.

Эхлээд Ж.Мэндбаярын одоогийн “Мөнгөн гүүр” эмнэлгийн барилга, түүнийг хэрхэн үнэлсэн талаарх баримтын талаар дурьдая. Одоо Баянгол дүүрэгт байрлах “Мөнгөн гүүр” эмнэлгийн байр газар нь “Глоб кредит” ХЗХ-ных. Хоршоодын хэрэг болсноос хойш гурван жилийн дараа буюу 2009 онд дээрх барилгыг мөрдөн байцаалтын шатанд 4.3 тэрбумаар үнэлсэн байдаг аж. Энэ үнэлгээгээр дуудлага худалдааны анхны үнийг тогтооно гэсэн Засгийн газрын тогтоол бий. Гэтэл уг тогтоолын дагуу барилгыг 4.3 тэрбумаар үнэлээгүй. Харин үүний оронд барилгыг 3 жилийн хугацаанд цоожлоод л орхичихсон аж. Ингээд дахин үнэлүүлэхэд 1 тэрбум 272 сая 900 мянган төгрөг болсон байна. 3 жил цоожлогдож, үйл ажиллагаа явуулаагүй барилга бараг 3 тэрбумаар үнэгүйдэж орхиж. Барилга ингэж үнэгүйдсний шалтгааныг дараах байдлаар дурьдаж бичсэн байх юм. Үүнд:

-Ашиглалтын бууруугаас халаалтын системийг хөлдөөсөн

-Систем хөлдөж хагарснаас ихээхэн хэмжээний ус алдаж барилга нийтдээ муудсан

-Давхаруудаас ус алдсанаас тааз, хана дахин засвар хийхээр болсон

-Их хэмжээний чийг алдсанаас дүүжин тааз, модон эдлэл, зарим шахмал материалаар хийсэн зүйлүүд цаашид хэрэглэхээргүй болсон

-Халаалтгүй удсан, ус алдаж чийгтэй байснаас барилгын засвар муудсан дахин сэргээн засварлах шаардлагатай болсон гэх зэргээр дүгнэлт гаргасан байна.

“Глоб Кредит”-ын Ж.Мэндбаярын үнэгүйдүүлсэн гэгдэж буй барилга нь 3000 м.кв, барилгын гадна талд 1300 м.кв орчим талбайтай автомашины ил зогсоол болон явган хүний талбайтай юм байна. Барилгын зоорийн давхарт 4 машины газар, саун, массажны газар, мини бар ажилладаг. Харин 1 давхарт контор, ресторан, караоке, стриптиз бар, 2 давхарт нь диско бар, хурлын заал, контор, VIP заал, 3-4 давхарт зочид энгийн ба люкс өрөөтэй зочид буудал байрладаг байж. Хувийнхаа бизнесийг явуулдаг түүний барилгыг үнэгүйдүүлж, худалдсанаас болж Ж.Мэндбаяр бие болон сэтгэл санааны ихээхэн хохирол амсаад байна. Тэрбээр өөрийнхөө хөрөнгийг зарж худалдаад хохирлоо бүрэн барагдуулах боломж байсан. Тийм боловч хөрөнгийг нь үнэгүйдүүлэн худалдаж, харин өөрөө 10 жилийн хорих ялыг биеэр эдлээд гарч ирлээ. Энэ хүн өнөөдөр өөрийн хөрөнгөө нэхэмжлэх нь аргагүй юм. Хэн нэгэн таны хувийн өмчийг үнэгүйдүүлэхийг та хэзээ ч хүлээн зөвшөөрөхгүй. Ингэж ч болохгүй. Гэтэл яагаад “Глоб Кредит” ХЗХ-ны дарга асан Ж.Мэндбаярын хөрөнгийг үнэгүй шахуу худалдаж орхив. Үүнд хэн хариуцлага хүлээх ёстой вэ?

Нэгдүгээр хороололд байрлах одоогийн “Мөнгөн гүүр” эмнэлгийн барилга 3000 м.кв. Уг барилгыг 2011 онд зарсан байдаг. Тэр үед үл хөдлөх хөрөнгийн үнэ өндөр байсан. Тухайн үеийн үнэлгээгээр м.кв-ыг нь 3 саяар үнэлвэл 3000 м.кв нь 9 тэрбум болно. Гэтэл өнөөдөр 1.2 тэрбумаар л худалдчихсан байгаа юм. Хэрэв хэрэг болсны дараа түүний барилгыг үнэлсэн бол тэрбээр хохирлоо барагдуулчих боломжтой байсан байна.

Үргэлжлэл бий…

Ц.Цацрал

Zaluu.com