ОХУ-ын Ерөнхийлөгч Владимир Путиний экс эхнэр Людмила Путин Германы “Die Welt” сонинд томоохон ярилцлага өгсөн тухай тус улсын хэвлэлүүд мэдээллээ. Тэрбээр ярилцлагадаа салсан нөхөр Путинийг аль хэдийнэ нас барсан хэмээн ярьсан байна. Уг ярилцлагын хэсгийг Оросын http://pilar-lar-lar.livejournal.com/4979.html болон хэд хэдэн сайт иш татаж уламжлав. Владимир Путин гуравдугаар сар гарснаас хойш олон нийтийн өмнө харагдаагүй тодорхой хугацаа өнгөрсөн. Хэвлэлүүд түүнийг нас барсан, Европ руу эмчилгээнд явсан, нууц амраг Кабаева нь амаржсантай холбон тайлбарласан ч Кремлийн тэргүүн эдгээр яриаг үгүйсгэсэн билээ. Харин түүний салсан эхнэр, Оросын экс тэргүүн хатагтай Людмила өдгөө гадаадад амьдарч байгаа бөгөөд В.Путинийг аль хэдийнэ нас барсан тухай ярьсан дуулиан тариад байна. Гэвч Оросын томоохон хэвлэлүүд түүний ярьсанд ач холбогдол өгсөнгүй. Өдгөө 57 настай Людмила Александровна долоо хоногт тутмын сонин “Die Welt”-д өгсөн ярилцлагадаа “Миний нөхөр аль хэдийнэ нас барсан. Олон нийт одоо энэ бүхнийг хүлээн зөвшөөрөх хэрэгтэй. Оросын тагнуулын алба Путинийг хөнөөх үед би зогсоож чадаагүй. Тиймээс намайг, охиныг минь хөнөөж ч болзошгүй байна” гэжээ. Мөн тэрбээр “Гэрлэсний дараа би тагнуулын ажилтнуудад таатай ханддаг байлаа. Гэвч удалгүй бодит байдалд огт өөр болсон. Путин бол хэрцгий, дарангуйлагч хүн байсан. Тэр намайг тоодоггүй, амьдарч байгаа гэдгийг ч анзаардаггүй байв. Түүнд гэрлэлтийн баталгаа, гэр бүлийн байдал л хэрэгтэй байсан. Путин намайг доромжилж, зодож байсан. Түүнтэй амьдрах нь надад эрүү шүүлт байлаа” хэмээгээд Людмила үргэлжлүүлэн “…Би түүнээс салахыг оролдсон. Намайг дуугүй болгохын тулд сэтгэцийн эмнэлэгт хүчээр хэвтүүлж, оюун ухаанд нөлөөлөх эм бэлдмэл өгч байсан. Би удаан хугацааны турш цоожтой өрөөнд байсан бөгөөд зөвхөн нарны гэрэл л харж байлаа. Намайг нэгэн шөнө гэртээ ирэхэд бүх эд хогшлыг эвдэн сүйтгэсэн байсан. Үл мэдэх хүмүүс “Та амьд явахыг хүсвэл чимээгүй бай” гэж захисан” гэжээ. Людмила Александровнагийн ярьснаар Владимир Путин аль хэдийнэ амиа алдсан бөгөөд түүний орлон тоглогчийг бэлэн болох үед амийг нь хөнөөсөн аж. Оросын экс тэргүүн хатагтай ямар хүмүүсийн тусламжтайгаар амьд үлдэж, гадаад гарч чадсан тухайгаа ярихаас татгалзсан байна.