-Тухайн үед яг юу болсон юм бэ?

-Өнгөрсөн сарын 13-нд  хагассайн өдөр манай хүүгийн төрсөн өдөр болоод “Өргөө” кино театрт  кино үзэх  билет захиалсан юм. Тэгээд киноны цаг арай болоогүй байсан учраас  хорооллын “Номин”-д хоол идэхээр орлоо. Өндөгтэй хуурга, плов захиалсан чинь өндөгтэй хуурга нь чинжүүтэй гарч байхаар нь чинжүүгүй гаргаж өгөөч гэж гуйсан. Бараг 40 минут хүлээхдээ завсараар нь 2-3 удаа чинжүүгүй гаргаж өгөөч гэж гуйсан. Тэгсэн чинь хоол авчрахдаа чинжүүтэй аваад ирсэн.  Тэгээд  чинжүүгүй захиалсан гэж хэлэхэд “уучлаарай” гэсэн юм. Тэр үедээ юм бодолгүй хоолоо идэж байтал ёроолоос нь бяцраад муудчихсан хагарсан халуун чинжүү гараад ирсэн. Удалгүй  хоолой бачуураад, хөл гар хөрөөд бие сонин болоод ирсэн. Арай ядан таван давхар руу нь гарч зохион байгуулагч, тогоочид нь хэлчихээд буухдаа  гурван давхарт ухаан алдаж унасан. Тэнд байсан танихгүй хүмүүс, хамгаалагч нар түшиж сандал дээр суулгасан. Бараг л гар хөл мэдээ алдаж хөрөөд, үхэх гэж байгаа юм шиг мэдрэмж төрсөн.

–Тэгээд одоо биеийн байдал нь гайгүй юу, эмнэлэгт хэвтсэн  үү?

-Хоолны газар байхдаа түргэний  эмч дуудсан. Эмч ирээд тариа хийх гэсэн чинь судас хатгагдахгүй байсан. Тэгээд маргааш нөгөөдрөөс нь эхлээд “Гурван гал” эмнэлэгт очиж ирээд эмчилгээ хийлгэсэн. Бүр эрчимт эмчилгээ хийлгэх дээрээ тулсан байсан. Эмчилгээ хийлгэж байхдаа бөөлжөөд гүйлгээд, татаад байсан. Одоо ч гэсэн гар хөл байнгаа хөрөөстэй байгаа учраас цаашид эмчилгээ хийлгэх шаардлагатай гэсэн.

–Тэр хоолны газар нь яг “Номин”-гийнх мөн юмуу?

-Эхлээд манайд зүгээр түрээсээр ажилладаг хоолны газар гэж байсан. Сүүлдээ мөнгө өгч тохиролцьё гэсэн. Хоолны газар “Номин”-гийн бонус картаар үйлчилж байсан. Тэгэхээр мөн юм билээ.

– Та ямар ямар байгууллагад гомдол гаргасан бэ?

-Хордлого авах үед амралтын өдөр байсан тэгээд ч эмнэлэгээр яваад чадаагүй. Дараа нь МХЕГ-т гомдол гаргасан. Тэгсэн чинь манайх хяналт шалгалт явуулахаа больчихсон. Иргэний гомдлын мөрөөр бол бүр ч шалгалт хийхгүй. Зөвлөн туслах үйлчилгээ үзүүлнэ гэж байна лээ. ШӨХТГ-т бас  гомдол өгсөн.

–Таны эмчилгээний зардал одоогоор хэд болж байна. “Номин”-гийн удирдлагууд танаас уучлал гуйх ч юмуу эсвэл эмчилгээний тань зардлыг төлөх талаар ярьсан уу?

-“Номин”-гийн удирдлагуудад өргөдөл өгсөн. Долоо хоногийн дараа хариуг нь өгнө гэсэн. Одоо болтол хариу өгөөгүй байна. Эмчилгээний зардал 600 гаруй мянган төгрөг болсон. Би тэд нарт миний эмчилгээний зардлыг өгчих юм бол би гомдол гаргахгүй гэсэн чинь 400 мянган төгрөг өгье. Баталгаа бичиж өг,  пловноос идэхгүй яах гэж өндөгтэй хуурга идсэн юм гэж намайг  загнасан. Би сая зүү эмчилгээгээ хийлгээд ирлээ. Эгч нь жаахан хүүхэдтэйгээ хоёулахнаа амьдардаг болохоор их хэцүү байна. Хүүхэд харах хүн байхгүй хичээлийг нь тасалдуулаад дагуулаад явж байна. Манайхан хаана  хаанаа хүнийг бодохгүй хэцүү болжээ.

С. САРУУЛ