Шийдлийн Засгийн газрын тэргүүн эдийн засгийн нөхцөл байдлаас шалтгаалан бүсээ чангалахыг сануулж, хэмнэж болох бүх зүйлийг хэмнэнэ хэмээгээд байсан юм. Ингээд 2015 оны төсөвт тодотгол хийх хуулийн төслийг УИХ-д мэдүүлээд байгаа. Тэгвэл энэ хуульд жирэмсэн эхчүүдийн тэтгэмжийн мөнгийг хасахаар заасан нь олны анхаарлыг татаад байна.

Тодруулбал  одоогийн хуулийн хүрээнд нийгмийн даатгалтай эхчүүд нийгмийн даатгалын сангаас төрөхийн өмнөх 2 сар, төрсний дараах 2 сар буюу нийт 4 сарын хугацаанд сүүлийн 12 сард авсан дундаж цалингийн 70-100 хувьтай тэнцэх тэтгэмжийг буюу дунджаар 1,071.0 мянган төгрөгийг олгодог. Мөн дээрээс нь халамжийн сангаас жирэмсний 5 сараас эхлэн нийт 12 сарын хугацаанд сар бүр 40 мянган төгрөг  олгодог. Харин Нийгмийн даатгалын санд хамрагдаагүй эхчүүдийн хувьд зөвхөн халамжийн сангаас жирэмсний 5 сараас эхлэн нийт 12 сард нийт 480 мянган төгрөг авч байгаа.

Гэтэл Нийгмийн даатгалын сангаас жирэмсэн, амаржсаны тэтгэмж авах эрх үүссэн эхчүүдэд нийгмийн халамжийн сангаас олгох жирэмсэн болон нярай, хөхүүл хүүхэдтэй эхийн тэтгэмжийг төрсөн сараас эхлэн 7 сарын хугацаанд олгодог болохоор тооцлоо гэж тусгажээ. Тэгэхээр жирэмсний 5 сартайгаас тэтгэмж авахаа больж.  төрсөн сараас эхлэн 7 сарын турш л тэтгэмж авна гэсэн үг юм. Жирэмсэн, хөхүүл эхчүүд бүтэн жилийн турш сар бүр 40 мянган төгрөгийн тэтгэмж авахгүй ердөө 7 сар авах нь. Бас жирэмсэн байхдаа энэ тэтгэмжид хамрагдах боломжгүй болж байгаа юм.