Америк орныг зорьсон дуучин  Э.Минжинсор нэгэн үе Монголын охидын хамтлагийн нүүр царай болж явсан “Spike” хамтлагийн дуучин байсан билээ.  Хамтлаг тарсны дараа ганцаараа дуулж, цомог хүртэл гаргаж явсан тэрбээр АНУ-д ажиллаж амьдрахаар одсон.  Ингэж явахдаа Грек залуутай хамт амьдарч, хоёр ихэр охинтой болсон дуучин бүсгүй уран бүтээлдээ түр завсарлаад байсан билээ.

Дуучин бүсгүй маань нөхөртэйгээ таарч тохирохгүйн улмаас харилцаагаа дуусгавар болгосон гэдгээ олон нийтээс нуусангүй. Мөн “Монголчууд гадаадын хүнтэй суусан хүмүүст их таагүй ханддаг. Гэхдээ бид санаатай ийм амьдрал сонгооүй юм шүү. Миний хувьд сонголтоо хийгээд л явсан. Гэхдээ охидууддаа хандаж хэлэхэд гадны хүнтэй битгий суугаарай. Бид хэзээд эх орноо л гэдэг юм шүү. Хэн ч гэсэн нутгаа л гэдэг. Би эх орон руугаа явна гэхэд манай хүн нутагтаа амьдарна гэдэг. Энэ мэт зөрчилөөс болж би эх орондоо ирсэн. Тиймээс сонголтоо зөв хийгээрэй” хэмээн зөвлөсөн нь цахим ертөнцөд дуулиан тарьсан.

Тэгвэл Э.Минжинсор энэхүү зөвлөгөөндөө тайлбар хийв. Тэрээр “Гадаад хүнтэй суугаад сайхан амьдарч байгаа хүмүүс зөндөө байна. Хэдий гадаадтай суусан ч зүрх сэтгэл нь Монголдоо байдаг учир тэднийг ойлгоорой гэж би хэлсэн. Сайтуудаар миний хэлсэнийг гуйвуулсан учир тайлбарлах нь зөв гэж бодлоо. Миний ФБ найз нар цаашаа үнэнийг дамжуулаарай. Баярлалаа” хэмээв.

Эх сурвалж: Шуурхай.мн