“Sony” компани Хойд Солонгосын удирдагч Ким Чен Уны талаар инээдмийн “Ярилцлага” кино хийсэн нь нэлээн шуугиан дэгдээгээд байгаа билээ. Тус киноны нээлт энэ сарын 25-нд болох байсан ч тодорхойгүй хугацаагаар хойшилсон байна. Тус киноны гол дүрийг бүтээж буй Жеймс Франко твиттертээ “Ким Чен Ун ялалт байгууллаа. Гайхалтай” гэж жиргэжээ.

Энэхүү киноноос болж “Sony” компани дотоод сүлжээгээ хакердуулж, “Жеймс Бонд”-ын шинэ ангийн зохиол болон тус компанид хамааралтай нууц материалууд нийтэд ил болсон аж. “Энхийг сахиулагчид” хэмээн өөрсдийгөө нэрлэсэн хакерууд “Sony” компанийн удирдлагуудад “Ярилцлага” киноны нээлтийг хийвэл 2001 оны есдүгээр сарын 11-нд болсон шиг халдлага үйлдэнэ гэдгээ анхааруулсан байна.