Хууль зүйн сайд асан Х.Тэмүүжин сүүлийн үед“Од”  болоод байгаа.  Учир нь,  тэрбээр өнгөрсөн долоо хоногт    нэгэн хувийн компанитай холбоотой дөрвөн сая ам.долларын талаарх баримтыг олон нийтэд дэлгэсэн юм.  Ингэхдээ тэрбээр  “Хуулийн нэр, хуулийн байгууллагын сүр хүчээр баялаг бүтээгчдийг дээрэмдэх –  авлигын хэмжээ”  хэмээн уг банкны хуулгыг тодорхойлсон нь эрхгүй хар төрүүлээд байгаа юм.  Өөрөөр хэлбэл,  тэрбээр томчуудтай холбоотой авлигын томоохон гэмт хэргийн талаар мэдээлсэн байх магадлалтай хэмээн олон нийт таамаглаж байгаа.
Ийнхүү түүний дэлгэсэн баримттай холбоотойгоор хэвлэлийнхэнд олон асуулт урган гараад байгаа юм. Энэ ч үүднээс баримтын талаар түүнээс тодруулахгэсэн сэтгүүлч цөөнгүй. Хэвлэлийнхэн ч энэ асуултдаа хариулт авахаар өнгөрсөн баасан гаригт Х.Тэмүүжин гишүүнийг хөөгөөд гүйцсэнгүй. Эрхэм гишүүн энэ талаарх мэдээллийг хэвлэлийнхэнд    өгөх нь бүү хэл,  асуулт асуусан сэтгүүлчийн хурдыг шалгаж,  чуулганы танхимаас өөрийнхөө өрөө хүртэл гүйх нь тэр. Түүний өрөө дөрвөн давхарт,  харин чуулганы танхим хоёр давхарт байрладаг.  Чухал баримт дэлгэсэн гишүүн ганц үг ганхийлгүй гүйсээр өрөө рүүгээ орсон юм.   Хэвлэлийнхнээс ийнхүү зугтах явцдаа тэрбээр сэтгүүлчийн хариулт авахаар сунгасан микрофоныг түлхсээр амжилттай  бултаж чадсан юм.