Төрийн байгуулалтын байнгын хороо өнөөдөр хуралдсан. Байнгын хорооны гишүүд татан буулгахаар яригдаад байсан Цөмийн энергийн газар, Тахарын албаны асуудлаар санал зөрөлдсөн юм. АН-ын зүгээс дээрхи газруудыг татан буулгах асуудлыг оруулж ирснийг байнгын хорооны гишүүдийн олонхи нь дэмжээгүй аж. Тэр дундаа УИХ-ын гишүүн Х.Тэмүүжин энэ асуудлыг эсэргүүцэн “Тахарын албыг татан булгах нь буруу. Өнгөрсөн жилд Тахарын алба байгуулагдсанаар олон дэвшилт гарсан. Арай гэж бий болгосон зүйлээ нураамааргүй байна. Би Ерөнхий сайдад хэлсэн. Надад ямарч сайд болох амбиц алга гэж. Урагш нь түлхэж чадахгүй юм бол битгий хойш нь чангаа. Энийг хэн нэгэн хүний захиалгаар хийх гэж байгаа бол буруу зүйл хийх гээд байна. Та нар яваад үзээрэй тэр хохирогчдын нүүр царай, энэ үйлчилгээг авч буй жирийн иргэдийг очоод нэг үз. Одоо гэр бүлийн хүчирхийллийн тухай хууль гарах гэж байна. Төрийн бус байгууллагууд түр орогнох байр бий болгоход араас нь агсам согтуу тавиад ирдэг. Бүр сүүлдээ тэр байрнаасаа хүртэл дайжих тохиолдол гарч байгаа. Одоо тахартай болоод ирсэн чинь агсам согтуу тавьдаг хүн нь багассан шүү гээд баярлаад сууж байна. Айдас хүйдэс нь алга болж байгаа юм. Үнэхээр гутаж байна” хэмээв.

Эх сурвалж: Шуурхай.мн