“Хүмүүс намайг асрамжийн газар аваачна л гэдэг юм. Муу өвчтэй хүүгээсээ холдоно гэхээр санаанд багтахгүй юм аа. Би хүүгээ сард ядаж нэг эргээд байна шүү дээ. Үхтэл үр харам гэж, барааг нь харж байгаад өнхөрье дөө, эмээ нь” хэмээн ярих өндөр настан Хорлоогийн талаарх мэдээлэл энэ амралтын өдрүүдээр олон нийтийн сүлжээ болон цахим сайтуудаар цацагдаж, олон хүнд нэгийг бодогдуулсан билээ.

Хорлоо гэх энэ хөгшин 90 насыг зооглож буй хэдий ч төрсөн ганц үрийнхээ төлөө үүрийн гэгээнээс үдшийн бүрий болтол Дэнжийн мянга, Бөмбөгөр Худалдааны төвийн худалдаачдад халуун цай зарж хэдэн төгрөг олдог. Тэрээр өдөрт 2-3 мянган төгрөг олж, түүгээрээ өдрийнхөө хоолыг залгуулж, үлдсэн хэдийгээ хадгалдаг байна. Өндөр настан Хорлоо өөрөөсөө харамлан байж хураасан мөнгөөрөө сард нэг удаа мэдрэлийн сааталтай хүүгээ эргэж очдог байна.

Уг нь тэрээр өдий насандаа хүүхдүүдийнхээ ачлалд бөмбөрч, ач гучаа тойруулаад алтан сургаалаа хайрлаад сууж баймаар. Гэтэл Хорлоо гэх энэ буурай хөхөө өвлийн хүйтэнд айлын хашаанд хэзээ мөдгүй нураад уначихмаар хуучин муу амбаарт олон жилийг үджээ.

“Монгол тусгал залуусын нэгдэл” ТББ-ын залуучууд олон нийтийн сүлжээгээр өндөр настан Хорлоод туслахаар уриалга гаргажээ. Сайн дураараа нэгдсэн залуучууд амралтын өдрүүдээр Хорлоо хөгшнийд очиж мод, нүүрс мөн хөнжил хувцас болон ойр зуурын хоол хүнс авах мөнгө хүргэж өгсөн аж. Мөн шинэ байшин барьж өгөхөөр болжээ.

Бид “Монгол тусгал залуусын нэгдэл” ТББ-тай холбогдоход “Өнөөдөр /12.01/ Хорлоо эмээд барьж өгөх байшингийнхаа суурийг тавилаа. 10 гаруй сая төгрөгөөр шинэ байшин барих төлөвлөгөө гаргасан. Барилгын ажил долоо хоног үргэлжлэх байх. Энд ажиллаж байгаа залуучууд сайн дураараа ирсэн. Хорлоо эмээд туслахыг хүссэн хүн бүр байшин барихад тусалж болно шүү гэдгийг хэлмээр байна. Өнөөдөр Хорлоо эмээг сувилалд амраахаар явуулсан” гэв. Дашрамд дурдахад, Хорлоо буурайд туслах мөнгөн тусламж сайхан сэтгэлт хүмүүсийн буянаар арвижсаар байна.

М.АМАРЖАРГАЛ