Та хүнсний бүтээгдэхүүн худалдаж авахдаа үйлд­вэрлэсэн хугацаа, дуусах он, сарыг нь сайтар анхаарч хардаг уу. Хэрэв анхаарч хардаггүй бол яг өнөөдрөөс эхлээд анхаарч байхыг зөвлөе.

Учир нь өнгөрсөн сарын сүүлээр буюу нийслэл хо­тын маань төрсөн өдрөөр бүхий л төрлийн бараа бү­­тээгдэхүүн 50 хувийн хямд­­ралтайгаар зарагдаж иргэдийн магнай ёстой л нэг тэнийх шиг болсон.

Гэтэл сайны хажуугаар саар гэгчээр зарим нэг хүнсний бүтээгэдэхүүн болон амт­тангуудынх нь амт чанар алдагдсан байсан нь ир­гэдийн сэтгэлийг багагүй гонсойлгоод авчээ.

Тухайлбал, Хан-Уул дүүргийн талбай дээр гарсан зад хямдралын үеэр “Скай” их дэлгүүрийн хямдарсан бараа бүтээгдэхүүнээс лааз­тай компот худалдаж авсан нэгэн хэрэглэгч манай редакцид хандсан юм.

Бид мэдээллийг нягталж тэнцвэртэй байл­гах үүднээс “Скай” их дэл­гүүрийн холбогдох алба­ны хүмүүс болон иргэн Баатар­тай уулзаж дараах мэ­дээллүүдийг авлаа.

Баатар: Иргэддээ сэрэмжлүүлэг болгох үүднээс хэлж байна

Хан-Уул дүүргийн 19 дүгээр хорооллын оршин суугч иргэн Баатар “Манай ээж нийслэлийн 375 жи­лийн ойн баярын өдрөөр тус дүүргийн гуравдугаар хорооны нутаг дэвсгэрт хямд­ралтай худалдаа явуулж байсан “Скай” их дэлгүүрийн бараа бүтээг­дэхүүнээс лаазалсан дөрвөн ширхэг “Lutik” компотыг худалдаж авсан байсан.

Тухайн өдөр худалдаж авсан компотныхоо хоёрыг нь задалтал өнгө нь алдаг­даж, жимс нь бяцарсан, шүүс нь булингартай их л муухай харагдаж байсан. Би ананасных нь компотноос нэг хэрчмийг идээд үзтэл маш муухай амттай бай­сан учраас дүү нартаа идүү­лэлгүй шууд хураасан.

Ингээд ээж маань “Скай” их дэлгүүрийн холбогдох алба­ны хүмүүстэй утсаар холбогдоход тус дэлгүүрийн орлогч захирал Машбат гэж хүн учир байдлыг сонсоод ойролцоо дэлгүүрнийнхээ нэг ажилтныг манайх руу явуулсан.

Ирсэн хүн нь ч муудсан компотыг харж “Үнэхээр муудсан” байна гэдгийг нь зөвшөөрөөд явсан. Түүнийг явсны дараа Машбат бидэн­тэй холбогдож ямар гом­дол санал байгаа талаар асуухад “Бидэнд 500 мянган төгрөгийг сэтгэл санааны хохирол гээд өгчих гэж л хэлсэн. Гэтэл тэд биднийг сүрдүүлж “Та нар хэвлэл мэдээллийн хэрэгсэлд хан­даж бизнесийн нэр төрийг минь гутаавал бид та нарыг шүүхэд өгнө” гэж хэлсэн. Тэгээд ээж маань мөнгөтэй хү­мүүс яаж ч магадгүй гэж айгаад энэ асуудлыг орхи­сон.

Гэтэл саяхан би тус дэл­гүүрээр үйлчлүүлтэл нө­гөө муудсан компот маш ол­ноо­роо худалдаалагдаж бай­­сан. Тиймээс л бид иргэ­дэд сэрэмжлүүлж анхаа­руу­лах нь зүйтэй гэж бодоод танай сонинд хандсан нь энэ.

Биднийг хэн нэгнээс мөн­гө шантаажлах гэж иймэр­хүү зүйл хийлээ гэж тус дэл­гүү­рийнхэн бодоод байх шиг байна. Бид ч бас хэ­рэг­лэгч учраас олон ний­тэд энэхүү мэдээллийг хүр­гэх нь зөв л гэж бодсон юм” гэв.

Машбат: Бидний бүтээгдэхүүн иргэдэд ямар ч аюулгүй гэдгийг МХЕГ тогтоогоод өгсөн

Харин “Скай” их дэлгүүрийн орлогч захирал Машбат “Тухайн өдөр компот худалдаж авсан нэгэн эмэгтэй надтай ут­саар холбогдож болсон үйл явдлыг хэлсэн нь үнэн. Ингээд би ойр байдаг салбар дэлгүүрийнхээ нэг ажилтныг явуулж муудсан компотыг шалгуулсан.

Хамгийн гол нь тухайн иргэн өөрөө компотыг задлаад хэдий хэрийн хугацаанд байлгаж байгаад идсэн бэ гэдэг нь тодорхойгүй шүү дээ. Бид дээрх эмэгтэйг “Та бүхэнд ямар гомдол санал байна вэ. Гомдлыг чинь заавал барагдуулж өгнө гэдгээ ч хэл­сэн.

Гэтэл тэрбээр “Надад та бүхэн 500 мян­ган төгрөг л өгчих өөр асуудал байхгүй” гэж хэлсэн. Хариуд нь бид өгөхгүй гэтэл “Тэгвэл би өөрийнхөө арга хэмжээг авч хэвлэл мэдээлэлд өгөх болно гэж хэлсэн. Яаж ч бодсон бидний буруу тогтоогдоогүй байхад бид тэр хүнд хэлснийх нь зоргоор мөнгө өгч болохгүй биз дээ.

Бид үүний дараа өөрс­дийн бараа бүтээгдэхүү­нээсээ дээж авч МХЕГ-ын таван лабораторид шинжилгээ муудсан хийлгүүлэхэд ямар ч төрлийн бодис илрээгүй. Тиймээс бид өнөөдөр энэ­хүү бараа бүтээгдэхүүнээ худалдаанд гаргаад ажил хэвийн үргэлжилж байна.

Тэгээд ч манай дэлгүүрт ча­нар хяналтын алба гэсэн 24 хүний бүрэлдэхүүнтэй маш том алба ажиллаж бүхий л бараа бүтээгдэхүүнийхээ он сар өдөр болон хугацааг сайн харж байж худалдаанд гаргадаг. Тиймээс бид хэрэг­лэгчээ хүндлэх үүд­­нээс тэдний гомдол са­налыг нэгдүгээрт тавьж гом­­дол гаргахаас нь өмнө бүтээг­дэхүүнээ байнга шин­жилгээнд өгдөг.

Эцэст нь хэлэхэд бид хэрэглэгчдийг найдвартай хүнсний бүтээгдэхүүнээр хангадаг гэдгээ ам бардам хэлэх л байна даа” гэв. Сэтгүүлч би бээр Машбатаас МХЕГ-ын лабораторийн шин­жилгээнийх нь хуудсыг авахыг хүссэн боловч тэрбээр цааргалан өгөхгүй байсныг дурьдах нь зүйтэй байх. Бид тус дэлгүүрийн лангуун дээр үнэхээр дээрх компот зарагдаж байгаа эсэхийг сонирхтол иргэн Баатарын хэлж байснаар худалдагдаж байсан юм.

Хэдийгээр тус дэлгүүрийн муудсан гэх компотных нь хугацаа гурван жилийн дараа дуусах байсан ч зарим нэг бүтээгдэхүүний хадгалалтын горим ал­дагдсан учраас баглаа боодол дээр асуудал гарсныг ч үгүйсгэхгүй юм.

Ер нь манай улсад хам­гийн их түгээмэл байгаа зүйл нь хэн дуртай хүн импортоор хүнсний бүтээг­дэхүүн оруулж ирж худал­даалж байна. Уг нь гадны улс орнууд импортоор орж ирж байгаа хүнсний бүтээг­дэхүүнд аль хэдийнэ хориг тавьж хатуу хяналтын дор импортолдог бөгөөд зөрчил давтагдвал бизнесийн эрхээ алдах эрсдэлтэй байдаг тул илүү хариуцлагатай ханддаг байна.

Эцэст нь хэлэхэд үнэ­хээр тус дэлгүүр зохих газарт нь шинжилгээ хийл­гэж бүтээгдэхүүнээ зөв шинжлүүлж судлуулсан уу гэдгийг бид холбогдох албаны хүмүүсээс нь асууж тодруулан хүргэх болно.

Р.Саруул

Эх сурвалж: