Чингэлтэй дүүргийн 108 дугаар цэцэрлэг дээр өнгөрсөн сарын 23-нд гурван настай охин цэцэрлэг дээрээ амиа алдсан харамсалтай хэрэг гарсан. Охин өдрийн унтлагынхаа  дараа сэрээгүй аж. Учир битүүлгээр нас барсан охины эцэг эх нь үхлийн шалтгааныг тогтоолгохоор задлан шинжилгээ хийлгэхийг зөвшөөрсөн байна. Гэвч эхний шинжилгээгээр охины хоолойд тээглэсэн зүйл байхгүй, ходоод гэдсэнд нь үхэлд хүргэх ноцтой зүйл илрээгүй гэж гарчээ.  Тиймээс дахин эд эсийн шинжилгээ авч архаг хууч өвчин болоод удамшлын ямар нэгэн өвчтэй байсан эсэхийг нь тогтоохоор ажиллаж байгаа юм байна.

Хэрэг гардаг өдөр тухайн ангид 60 хүүхэд ирсэн байжээ. Цэцэрлэгийн анги танхим хүрэлцээ муутай байгаагаас нэг ангид байх ёстой хүүхдийн норм их байх ёстой хэмжээнээсээ хэтэрсэн талаар ярьдаг. Тухайн ангид олон тооны хүүхэд байснаас агаарын дутагдалд орсон байж болзошгүй гэх таамагласан. Тэгвэл цагдаагийн байгууллагынхны хэлж байгаагаар ямар нэгэн агаар дутагдсан болоод гадны ямар нэгэн нөлөө байхгүй гэх дээрх тайлбарыг өглөө.

Уг хэргийг Чингэлтэй дүүгийн Цагдаагийн хэлтэс Эрүүгийн тухай хуулийн 95 дугаар зүйлийн нэг дэх хэсгийг үндэслэн шалгаж байна. Золгүй байдлаар амиа алдахад хүргэсэн тохиолдолд иргэний гомдол хамааралгүй энэ заалт дээр тулгуурлан хэрэг үүсгэж шалгадаг юм байна.

Эх сурвалж: Шуурхай.мн