Өнгөрсөн долоо хоногт дөнгөж төрсөн хоёр нярай гудамжинд осгож нас барсан байдалтай олдсон талаар цагдаагийн байгууллагаас мэдээлсэн. Тодруулбал, тэдний нэг нь Их нарангийн орчмоос олдсон бол нөгөө нь орон сууцны хогийн цэгээс олдсон байдаг. Тэгвэл Цагдаагийн байгууллагынхан шуурхай эрэн сурвалжласны үр дүнд төрсөн үрээ гудамжинд хаясан нэг ээжийг олсон байна.

Төрүүлсэн хүүгээ Их нарангийн орчимд хаясан ээж өдгөө 19 настай бөгөөд ЭХЭМҮТ-д эрүүл саруул амаржсан нэгэн байжээ. Тэрбээр “Хэн нэгэн миний хүүг олоод өсгөх байх гэж бодоод би хүүгээ гудамжинд үлдээсэн чинь осгоод үхчихлээ” хэмээн уйлаад зогсч байжээ. Харин нөгөө ээжийг нь хараахан олоогүй байгаа юм байна.

Энэ төрлийн гэмт хэргийг үйлдсэн этгээдүүдийг Эрүүгийн хуулийн тусгай ангийн 117 дугаар зүйлийн 117.2-т зааснаар эрүүгийн хариулцлага хүлээлгэдэг байна. Тодруулбал, уг хуулийн 117.1-т “Төрүүлсэн болон үрчлэн авсан хүүхдээ хаясан, төөрүүлсэн бол хөдөлмөрийн хөлсний доод хэмжээг тавин нэгээс хоёр зуун тавь дахин нэмэгдүүлсэнтэй тэнцэх хэмжээний төгрөгөөр торгох, хоёр зуун тавин нэгээс гурван зуун цаг хүртэл хугацаагаар албадан ажил хийлгэх, эсхүл гурван зуун цаг хүртэл хугацаагаар албадан ажил хийлгэх, эсхүл гурваас дээш зургаан сар хүртэл хугацаагаар баривчлах ял шийтгэнэ. 117.2-т Харин энэ хэргийн улмаас хүүхдийн амь нас хохирсон, бусад хүнд хор уршиг учирсан бол таван жил хүртэл хугацаагаар хорих ял шийтгэнэ” гэх хуулийн заалттай юм байна.

Өнгөрсөн онд мөн ийм хэрэг гарч байсан бөгөөд хүүхдээ хаясан ээжид шүүхээс гурван жилийн хорих ял оноож байсан юм.

Uls.mn