Ерөнхий сайдын ахлах зөвлөх Л.Гансүхэд Бээжингийн Яамэй эмнэлгээс энэ сарын 20-ны өдөр мэдэгдэх хуудас иржээ.Уг мэдэгдэлд “Манай эмнэлэг танд туссан зүрхний цус багадалт, зүрхний шигдээс өвчнийг 3 жил эмчилж илэрхий үр дүн гаргасан. Гэсэн ч өвчний байдал харьцангуй хүнд учраас шаардлагын дагуу 2-3 сар тутамд нэг удаа хавсарсан эмчилгээ хийлгэх шаардлагатай. Таны түрүүчийн удаагийн эмчилгээ хийлгэсэн хугацаа нь зургадугаар сарын 28-ны өдөр, одоо эмчилгээний завсарлах хугацаа дууссан тул ойрын өдрүүдэд цагаа зохицуулан манай эмнэлэгт ирж эмчилгээгээ хийлгэнэ үү. Бээжингийн Яамэй эмнэлгийн Хятад анагаах ухааны II тасгийн эмч, профессор Ма Зижоу” гэжээ.

Энэ арай ч хэрээс хэтэрсэн явдал бус уу. Бээжингийн Яамэй эмнэлэгийн алгын чинээ цаас Монголын шүүхийн шүүгчийн захирамжийг цуцлуулж Ерөнхий сайдын ахлах зөвлөх Л.Гансүхийг хорихоос суллуулах хүчтэй гэж үзэж байгаа аж. Тэгвэл Хятадын хэвлэлд “Монгол Улс Хятадтай өөрсдөө нэгдэх гээд сөгдөн гуйж байна” гэсэн нийтлэл ч энэхүү эмнэлгийн бичгийн нэгэн адил Монголын төрийг доромжилж байна.

Монгол Улсын Засгийн газар нь Хятадын Засгийн газрын тавьсан шаардлага бүрийг шат дараалалтай биелүүлж байгаагийн нэг илрэл нь нарийн царигийн төмөр замын асуудлыг УИХ-аар хүч түрэн шийдүүлсэн болон Bank of China-ийн салбар байгуулах асуудал чухам аль шатандаа явааг нууцалсаар байгаа. Харин одоо “Манай хууль тогтоох болон шүүх байгууллагын шийдвэрт нөлөөлөхөөр” захын нэг хувийн эмнэлэг доромжилсон өнгө аястай бичиг явуулж байна. “Найрамдалт өмнөд хөршийн эмнэлэг юм шүү” гээд шүүгчийн захирамжийг цуцалж Л.Гансүхийг суллах уу. Өөр хэнийг суллах вэ, заагаад өгөөч Бээжингийн эмнэлгүүд ээ, захиа бичээрэй!