Орой бүр айл бүрийн хойморт заларч, цэнхэр дэлгэцээр уулздаг нэвтрүүлэгч С.Чимгээ 47 жилийн түүхтэй Монголын ууган телевиз МҮОНТ гэх том “айл”-аас гарч “Монгол HD” телевизийн нүүр царай болсон билээ. Харин түүний энэхүү сонголтыг олон хүмүүс гайхаж хүлээн авч байгаа бөгөөд зарим нэг нь “Их мөнгө амлаж урьсан юм билээ”, “Удирдлагатайгаа ам мурийсан гэнэ” гэх зэрэг элдэв таамаг цуурхал дэвшүүлж ярих болсон. Тэгвэл Монголын тайз дэлгэцийн урдаа барьдаг сайхан хүүхнүүдийн нэг нэвтрүүлэгч хөтлөгч С.Чимгээ энэ тухайгаа нэгэн хэвлэлд өгсөн ярилцлагадаа тайлбарлажээ. Тэрээр “Сургуулиа төгсөөд Монголын үндэсний олон нийтийн телевизэд анх хөл тавьснаас хойш 19 жил өнгөрчээ. Тэр саарал байшиндаа хоёргүй сэтгэлээр, хариуцлагатайгаар, алдаа гаргахгүй гэж хичээж, мэрийлттэй ажилласан гэж өөрийгөө дүгнэдэг. Намайг сургууль төгсөөд очиход алгаа дэлгээд тоссон миний хоёр дахь гэр минь байлаа. Мэдээж өсөж торнисон газраа орхиж явах хэцүү. Нухацтай бодсоны эцэст тэндээс явахаар шийдсэн. Хүн нэг газраа удахаар зэвэрдэг юм байна. Ажилдаа ирэхдээ өнөөдөр юу хийх вэ, яах вэ гэсэн байнгын тэмүүлэлтэй байх ёстой байтал би амьдралынхаа хэв маягийг өөрчлөх юмсан гэсэн гундуухан болсноо ажигласан. Бас МҮОНТ-ээс гаръя даа гэсэн бодол төрүүлэх ганц, хоёр үйл явдал болсон ч тэр нь айхтар том түлхэц болоогүй л дээ. Энэ оны эхээр “Херо” энтертайнментийн Баатар найруулагч надад “Оскар”-ын шагнал гардуулах ёслолын ажиллагааг шууд дамжуулахад хөтлөөч гэсэн санал тавьсан юм. Орчин цагийн телевизийн урлагийг мэдэрдэг мундаг найруулагч урьсан болохоор уухайн тас зөвшөөрөлгүй яах вэ. Гэхдээ тэр нэвтрүүлгийг “Монгол” телевизээр хөтлөхөө хожим нь мэдсэн. Энэ зун ажлаасаа гарах шийдвэр гаргачихаад, нэг хэсэгтээ гэр зуур байя гэж бодтол хувьсгалын тохироо бүрдэнэ гэгчээр хэд хэдэн телевизээс санал тавьсан. Би багагүй хугацаанд бодсоны эцэст “Монгол” телевизэд орсон доо. Миний хамгийн сайн зөвлөгч бол хань минь. Энэ тухай хамгийн түрүүнд нөхөртөө хэлэхэд “Чи л мэд. Өөрийн сонголт л зөв байдаг. Салбартаа өнгөлөг, шинэлэг төрхтэй, илүү ихийг хийе, бүтээе гэсэн залуучууд чамд итгэл хүлээлгээд урьж байгаа бол очих нь зөв” гэж зөвлөсөн. Олон нийтийн телевизийг орхиод шинэ залуу хамт олныг сонгоно гэдэг зоригтой шийдвэр гэж найзууд ч хэлсэн. Хийвэл бүү ай, айвал бүү хий гэсэн үгийг дотроо бодож л явлаа. Гэхдээ би шийдвэртээ харамсаж, эргэлзээгүй ээ” хэмээн ярьжээ.

Эх сурвалж: Шуурхай.мн