Цагдаа, хүчний байгууллагынхныг байс гээд л ажиллаж буй газар, орон нутгийг нь сэлгэдэг шиг зарим улсын төсийн мөнгийг захиран зарцуулдаг, хуваарилдаг эрх мэдэл бүхий нөхдийг сэлгэж, хөдөлгөж байхгүй бол тендер зэрэг зүйлд гаршиж, идэх уух нь арга нь нарийсч хэрээс хэтрэх болжээ. Монголын үндэсний үйлдвэрлэгчид, жижиг дунд бизнес эрхлэгчидтэй холбоотой олон тендер зарлагдаж байдаг ҮХААЯ-ны удирдлагууд үүнд нэлээд хамаатай. Ялангуяа, тус салбарын дэд сайдаар ажиллаж байсан, одоо яамны төрийн нарийн дарга хийж буй Х.Золжаргалыг АТГ-аас дараах тендерүүдтэй холбогдуулж нэгбүрчлэн шалгах хэрэгтэй санагдана.

Х.Золжаргалыг шалгах 1 дүгээр шалтгаан буюу бүгдийн мэдэх шүлхийн вакцин

Хамгийн зард гарсан дуулиант хэрэг бол энэхүү шүлхийн вакцины хэрэг. Энэ тухай амтай бүхэн ярьдаг ч АТГ л таг дуугүй байгаа. Х.Золжаргалын шууд оролцоотойгоор ялсан гэгдэх “CBC” компаний 1,6 сая тун вакциныг Хятадаас оруулж ирсэн энэ хэргийн мөрөөр заавал орох хэрэгтэй. Энэ компанийг тендерт ялуулснаас үүдэлтэйгээр олон тэрбум төгрөгийн вакцин хөлдөж, түүнийг нь өмгөөлсөн Х.Золжаргал дарга шүлхийтэй малын махыг эдийн засгийн эргэлтэнд оруулах тухай тун таагүй мэдээллийг хийн олон түмний дургүйцлийг төрүүлсэн.

Х.Золжаргалыг шалгах 2 дугаар шалтгаан буюу “Мон хидро”-той холбоотой тендерүүд

Сэлбэ голын тендерээсээ болж хууль хяналтын байгууллагаар шалгагдсан Баянхонгорын гаралтай Ц.Батдорж гэх захиралтай “Мон хидро” компанийг “Хэрлэн говь” төсөлтэй шууд холбоотой нэгэн тендерт ялуулсан хэрэг анхаарал татна. “Сайншанд аж үйлдвэрийн цогцолбор” төслийн хүрээнд “Бүс нутаг хооронд ус тээвэрлэх боломжийн талаар судалгаа, техник эдийн засгийн үндэслэл, зураг төсөл боловсруулах зөвлөх үйлчилгээний гүйцэтгэгчийг сонгон шалгаруулах” уг тендерийг Х.Золжаргал дарга “Мон хидро” компанид л заавал өгөх үүргийг “дээд тэнгэр”-ээсээ авч үүргээ онц биелүүлсэн гэдэг.

Х.Золжаргалыг шалгах 3 дугаар шалтгаан буюу ноос, ноолуурын 23 тэрбумын хэрэг

Жил жилийн намар сурагчдын дүрэмт хувцасны хэрүүл “дэвэрдэг”. Харин энэ “шуумыг” Х.Золжаргал дарга дарж сурсан нэгэн. Энэ жил дүрэмт хувцсыг оёх эрхийг ямар ч сонгон шалгаруулалтгүйгээр 7 компанид өглөө гэгдсэн Х.Золжаргал дарга өнгөрсөн жил оёдлын 68, сүлжмэлийн 48, хялгас ялгах 8, ээрэх 6 нийтдээ 130 үйлдвэрийг сурагчдын дүрэмт хувцас үйлдвэрлэх үйл ажиллагаанд оролцож байгаа гэж мэдэгдэж байв. Тэр 20 тэрбумын ажлыг дотооддоо 250 тэрбум болгохоор ажиллаж байгаа нь энэ гэж хэлсэн. Гэхдээ энэ 23 тэрбумыг хэрхэн хуваарилсан, хэн хэн авсан нь бас сонирхол татна. Ноос үйлдвэрлэгчдийн холбоонд 14 тэрбумыг нь, Оёдолчдын холбоонд 9 тэрбумыг нь хуваарилсан уг “бялуунаас” Могул нэртэй нэг компани гэхэд л 13 тэрбумыг авсан гэх. Харин энэ их мөнгөний 1 хувийг нь буюу 230 сая төгрөгийг хянах, зохицуулах ажилд зарцуулна хэмээгээд хэн авсан нь тодорхой бус гэдэг. Төрийн нарийн Х.Золжаргал үйлдвэрлэлийг хянахаар чамлахааргүй “хөлстэй” ажилласан ч байж болох юм. Энэ мэтчилэн олон асуудал ҮХААЯ-ны хөнгөн үйлдвэрлэлийн салбарт шалгагдах өдрөө хүлээгээд байж байгаа. Энэ 23 тэрбум нь Чингис бондын мөнгө учир “Улсын төсвийн хөрөнгөөр юу ч худалдаж аваагүй” хэмээн Х.Золжаргал биеэ өмөөрдөг.

Х.Золжаргалыг шалгах 4 дүгээр шалтгаан буюу Мөнхийн ялагч “Баатрууд тэнгэр” ХХК-тай холбоотой хэрэг

Жил бүр улсын төсвөөс 100-гаад тэрбум төгрөг төсөвлөгддөг, хүмүүсийн гол амьжиргаа болсон мах бэлтгэн нийлүүлэх тендер ҮХААЯ-ны төрийн нарийн бичгийн даргын гол анхаарлаа хандуулдаг ажлынх нь нэг юм. Нөөцийн мах бэлтгэн нийлүүлэх зориулалттай уг тендерийг 3-4-хөн компани л гартаа атгачихаад тавихгүй байгаа бөгөөд өөрсдөө тендерийн шаардлагыг хангахгүй хэрнээ ялчихаад өрөөл бусдыг туслан гүйцэтгэгчээр авч тэрбум тэрбумын ашигтай, орлоготой ажилладаг ийм байгууллагуудын нэг нь М.Цэцэгмаа захиралтай “Баатрууд тэнгэр” ХХК. Жилийн жилд нөөцийн махны менежерээр төвөггүй шалгарч байдаг энэ компанитай ҮХААЯ-ны төрийн нарийн бичгийн дарга Х.Золжаргалыг “хүйн холбоотой” шахуу блсон гэх хардлага бий. Хэзээ “Баатрууд тэнгэр” ХХК-д нөөцийн махны санхүүжилт хийгдэх, хэзээ “Баатрууд тэнгэр” ХХК банкинд сертификатаа аваачиж өгөх, хэзээ “Баатрууд тэнгэр” ХХК-ний дансанд нөөцийн мах бэлтгэх мөнгө орж ирэхийг нь хүртэл Х.Золжаргал дпарга нэгд нэггүй мэдэж байдаг болохоор ингэж хардах нь ч арга үгүй биз ээ.

Энэ мэтчилэн ҮХААЯ-ыг тойрсон бараг бүхий л тендерт Х.Золжаргалыг холбогдуулан бүгд л ярилаа. Одоо АТГ дуугарах л үлдлээ.

Л.Оюу

– See more at: http://www.unen.mn/content/39958.shtml?alias=unen#sthash.uryzdsfC.dpuf