Анх хууль зүйн сайдтай нэр холбогдож олны анхаарлыг татаж байсан Г.Сарангэрэл охины зовлон дуусахгүй бололтой. Хар тамхи хэрэглэсэн хэргээр анхан шатны шүүхээс 1.6 жилийн хорих ял сонсоод буй Г.Сарангэрэлд дахин эрүүгийн хэрэг үүсгэжээ. Тодруулбал, Г.Сарангэрэлийг өнгөрсөн долдугаар сарын эхээр гадуур явж байхад нь үл таних этгээд болох Д гэгч 28 настай эр зодсон гэдэг. Тэрээр Г.Сарангэрэл шүүх хурал дээрээ толгойгоо бентээр ороон ирж байсан. Тиймээс Баянгол дүүргийн цагдаагийн хэлтсээс иргэн Д гэгчид Г.Сарангэрэлийг зодсон гэж Эрүүгийн хуулийн тусгай ангийн 181-т зааснаар танхайн хэргээр хэрэг үүсгэн шалгаж байсан юм. Тухайн үед Г.Сарангэрэл Д гэгчид зодуулсаны улмаас ШШГЕГ-ын харьяа цагдан хорих 461 дүгээр ангийн эмнэлэгт хэвтэн эмчлүүлж байсан.

Гэтэл мөрдөн байцаалтын явцад тус дүүргийн цагдаагийн хэлтсээс Г.Сарангэрэлийг 28 настай Д гэгч эрэгтэйг зодсон гэж Эрүүгийн хуулийн тусгай ангийн 181.2.1-т зааснаар эрүүгийн хэрэг үүсгэн шалгаж эхэлсэн байна. Тус зүйл заалтад догшин авирлаж танхайрсан гэж заасан байдаг юм байна. Г.Сарангэрэл өмнө нь хоёр удаа шүүхээр шийтгүүлж байсан бөгөөд өмнө нь хулгайн хэргээр ял сонсож байжээ. Харин хар тамхины хэргээр саяхан ял сонсож хоригдож байгаа  юм. Шүүхээр гурван удаа ял сонссон этгээдийг хуулийн дагуу онц аюултай гэмт этгээдэд тооцдог. Тэгвэл энэ удаа шүүхээс түүнийг буруутай гэсэн шийдвэр гарвал дөнгөж 19-хөн насан дээрээ Г.Сарангэрэл  “онц аюултай гэмт хэрэгтэн” болох юм.

Хэдийгээр нийгэмд сөрөг мэдээллээр олонд танигдсан ч Г.Сарангэрэлийг Монгол улсын иргэн хүн гэдгийг цөөхөн хэдэн монголчууд бид мартаж болохгүй. Гэтэл хууль байгууллагынхан 19-хөн настай охинд хүндэтсэн зовлон учруулж, хэтэрхий хавчиж байх шиг. Г.Сарангэрэлд зодуулсан гэх 28 настай залуу хамгаалалтын албанд ажилдаг нэгэн аж. Тийм байтал 19-хөн настай эмэгтэй хүнд зодуулна гэдэг арай л худлаа санагдав. Г.Сарангэрэлд танхайн хэргээр эрүүгийн хэрэг үүсгэсэн нь зохион байгуулалттай хэргийн золиос болж байгаа юм биш гэх хардлага төрүүлээд байгаа юм.

Эх сурвалж: Шуурхай.мн