Уулзалтын эхэнд гишүүн С.Одонтуяа Монгол Улс, Өмнөд Африкийн Бүгд Найрамдах Улстай дипломат харилцаа тогтоосны 20 жилийн ойн хүрээнд айлчилж байгаад талархаж буйгаа илэрхийлээд, хоёр орны парламентийн хоорондын харилцаа, хамтын ажиллагааг улс төрийн яриа хэлэлцээ, харилцан айлчлалаар цаашид бэхжүүлэх сонирхолтой байгааг онцлон тэмдэглэв. Мөн хоёр орны парламент хоорондын бүлэг байгуулагдсаныг мэдэгдэж, бүлэг нь парламент хооронд шууд хэлхээ холбоог тогтооход чухал үүрэгтэй байх болно гэдгийг хэллээ.

Ноён Бхеки Уинстон Жошуа Лангаг  Өмнөд Африкийн Бүгд Найрамдах Улсын Эрх чөлөөний өдрийн 20 жилийн ой, хоёр улсын хооронд дипломат харилцаа тогтоосны 20 жилийн ойтой давхцаж байгааг хэлээд, яг энэ өдөр Өмнөд Африк Улсад Ерөнхийлөгчийн болон парламентийн сонгууль явагдаж байгааг дуулгалаа. Мөн тэрээр сүүлийн үед хоёр орны харилцаа, хамтын ажиллагаа маш эрчимтэй хөгжиж байна гээд ялангуяа уул уурхайн баялгаараа ижил төстэй орнуудын хувьд энэ салбарт хамтран ажиллаж, туршлага мэдлэгээ солилцох болно гэлээ.