Иргэдэд газар өмчлүүлэх ажил эхэлсээр бараг долоон жилийн нүүр үзэж байгаа ч одоо болтол дуусаагүй хэвээр.

Энэ асуудал хөндөгдөх бүрт эрх баригчдын амнаас “иргэдийн идэвх сул байна” гэсэн үг байнга унадаг.Гэтэл яг үнэндээ иргэд газар үнэгүй өмчилж авах боломж алга. Олны яриа ортой гэдэг.

Баянголын аманд анх газар олгож эхлэх үед замын баруун талын газрыг иргэд “Т.Бадамжунайгийн газар” гэж нэрлэдэг, энд нь нэг ч айл буудаггүй байсан нь одоо ч хэвээрээ.

Тэр газрыг орон сууцны хороолол барих зорилгоор, айл өрхөд биш аж ахуйн нэгж, компаниудад л хувьчлахаар хадгалж байсан юм билээ.

Долдугаар хорооллын хэдэн айхтар айлаас ч болсон юм уу, эрх баригчид “Компаниудад л өгнө, ахуйн зориулалтаар эзэмшүүлэхгүй” гэсэн “хаалт”-ыг иргэдийнхээ өмнө тавиад удлаа.

Миний бие Баянзүрх дүүргийн 11 дүгээр хороонд газар эзэмших боломжийг сураглахаар дүүргийн газрын албанд хандахад “Өрхөд эзэмшүүлэх газар байхгүй ээ. Орон сууц барих аж ахуйн нэгжүүдэд л өгөх журам гарсан” гэсэн хариулт сонсоод буцаж байсан удаатай.

Гэтэл яг тэр журам хэрэгжиж байгаа гэсэн газарт нь “1.5 сая төгрөгөөр газар авахыг” таньдаг хүн санал болгоод байдаг.

2012 оны сонгуулийн дараа МАН-ын харьяалалтай “эвэртэн” төдийгүй “тууртнууд” хүртэл албан тушаалаа сүүлчийн удаа урвуулан ашиглах операцийг амжилттай хэрэгжүүлсэн.

Салбар бүрт хэрэгжиж байсан энэ ажиллагаа газрын албадад хамгийн их хамаатай байсныг сайн санаж байна.

“Газрын албаныхан нь удахгүй солигдох гэж байгаа гээд сул газруудаа зарж байна. Мөнгөө өгчих л юм бол өдөрт нь ч хамаагүй гэрчилгээг нь гаргаад өгье гэнэ” гэцгээн шуугиж байсныг мэдэх нэг нь мэдэх л байлгүй.

Төрөөс хүлээсэн ажил үүргээ хийж байгаа газар зохион байгуулагч төлөвлөлтөд орсон газраа “зарна” гэсэн тухай хамаатны дүү маань хэлээд “Үнэхээр үнэгүй авчих арга байхгүй гэж үү” хэмээн аргаа барчихсан явахтай таарлаа. Хуулийн байгууллагад ажилладаг танилдаа энэ талаар хэлж, төрийн бодлогыг жирийн нэг газар зохион байгуулагч алдагдуулж байгааг хэлэхэд “Үнэхээр дажгүй байрлалтай юм бол мөнгийг нь өгөөд л авчихаач дээ.

Таван саяар таван айлын газар гэдэг чинь хямдхан байна. Тэртэй тэргүй, газар зохион байгуулагчтай харьцахгүйгээр газар эзэмшинэ, өмчилнө гэж байхгүй” гэж хариулах юм.

“Өлзийт” хорооллын цаад талд Арабын шахын эзэмшил газар байдаг юм байна. Уул, ус нь тэгшхэн унэхээр сайхан газар юм аа. Өлзийт хорооллоос барааны л газар юм.

Замын хойд талын тэгшхэн сайхан газарт хашаа хатгаад суучихаач гэж нутгийн иргэнд зөвлөтөл “Гүндалай авчихсан” гэж хариулах юм.

Хот орох замд 10 байтугай 100 айл багтах том том газрыг хашаалаад авсан байх нь байсгээд л таарах.

“Бодвол хэн нэг даргынх нь л газар байх даа” гэж бодогдох. Баячууд нь 70, 700, бүр хэдэн мянган га газар авч болж байхад жирийн иргэдэд яаж газар олдох юм бэ.

Өнөөдөр Монголд мөнгөтэй, олон компанитай хүн тэр олон компанийнхаа нэр дээр”орон сууц барина” гээд хэчнээн ч хэмжээгээр газар авах боломж байна.

Харин иргэдэд жилд багахаан газар төлөвлөдөг ч дээр хэлсэнчлэн газар зохион байгуулагч нар нь “местээ” ашиглана.

Үнэндээ иргэдийн идэвх сул байгаа хэрэг би, хууль хэрэгжүүлэгчид мөнгөтэй баячуудтай хуйвалдаад байгаад л хамаг учир оршиж байна.

Х.Батсайхан

/Монголын мэдээ/