Цагдаагийн тангараг” киногоороо дамжуулж тө­рийн эрхийг санаатайгаар булааж авахыг оролдсон гэх үндэслэлээр өнгөрсөн хоёр жил гаруй хугацаанд шалгагдсан найруулагч Г.Бадамрагчаа нарын гурван хүнд холбогдох хэргийг хэ­рэгсэхгүй болгосон.

Тэгвэл өнгөрсөн хуга­цаанд ШШГЕГ-ын харьяа цагдан хорих 461 дүгээр ангид саатуулагдсан най­руулагч Г.Бадамрагчаа хууль бусаар хоригдсон талаараа өчигдөр мэдээлэл хийлээ.

Тэрбээр зохион байгуу­лалттайгаар гүжирдэж, өө­­­рийг нь хилс хэрэгт уна­гасан. Мөн өөртэй нь зүй бус харьцаж байсан хоёр бай­цаагчийг АТГ, ТЕГ, УПЕГ-аар шалгуулах өргөд­лөө өнөөдөр /өчигдөр/ өгчээ. Түүнээс цөөн асуултад хариулт авсан юм.

-Тэгэхээр та энэ хэргийг анхнаасаа санаатайгаар зо­хион байгуулсан гэж үзэж байна уу?

-Хоёр жилийн өмнөөс намайг төрийн эсрэг гэмт хэ­рэг хийсэн гэж үзэж ТЕГ-аас баривчилж, мөрдөж шалгаад Ганц худагт гурван сар хорьж байсан. Хоёр жилийн хугацаанд нэлээд зовоосон. Тэгээд энэ оны хоёрдугаар сарын 28-нд болсон шүүх хурлаар уг хэргийг хэрэгсэхгүй болгож намайг цагаатгасан. Энэ бол эхнээсээ зохиомол, гүжир гүтгэлгийн чанартай хэрэг байсан.

Тиймээс би ТЕГ, АТГ, Монгол Улсын Ерөнхий про­курорын газарт өргөдөл гаргаж байна.

Өргөдлийн утга нь энэ зохиомол хэргийг надад тулгаж байх явцдаа мөрдөн байцаагч Энхтөр, Цогтбаатар нарын хүмүүс Эрүүгийн байцаан шийтгэх хууль, Үндсэн хууль гэх мэтчилэн хууль тогтоомж зөрчиж, дарамталж, зовоож янз бүрийн аргаар мэдүүлэг авч байсан асуудлыг шал­гуулах зорилготой байгаа юм.

Тиймээс өргөдлөө эхлээд тэдэнд биш хэвлэлийнхэнд хандаж байгаа маань дээрх хүмүүс яахаас ч буцахгүй учраас сэрэмжилж байгаа хэрэг. Энэ өргөдлийг өгс­нөөр миний амь нас, гэр орны аюулгүй байдалд заналхийлэх магадлал өндөр байгаа юм.

-Та яагаад тэр хүмүү­сийн зүгээс дарамт ирж магадгүй гэж үзэж байгаа юм?
-Учир нь хоёр жилийн хуга­цаанд энэ хүмүүсийг ямар хүмүүс вэ гэдгийг би мэдсэн. Намайг яаж дарамталж, ямар байдлаар ажлаа хийдэг гэдгийг ч мэддэг болсон учраас.

Би ямар нэг хүний мууг үзэх гэсэндээ биш иймэрхүү арга ажиллагаатай нөхдүүд хуулийн байгууллагад байх ёсгүй. Ийм хүмүүс байгаа нөхцөлд цаашид олон хүнийг хэлмэгдүүлэх магадлал өн­дөр байгаа гэдгийг зориуд цохон тэмдэглэж байна.

-Шүүхийн шийдвэр гар­саны дараа танд ямар нэг дарамт шахалт ирсэн үү?

-Нууц дугаараас залгах, чагнах гэх мэтчилэн асууд­лууд байдаг.
Энэ болгоныг шалгуулах хүсэлт өгсөн газрууд шалгаад эхлэхээр дэлгэрэнгүй мэ­дээлэл өгнө гэсэн бодолтой байна.

-Таныг бас киноны тен­дерийн асуудлаар хөө­цөлдөөд яваа гэж сонссон. Энэ талаараа тайлбарлаач?

-2012 онд тухайн үеийн БСШУЯ-наас түүхэн киноны тендер шалгаруулах уралдаан зарласан.
Тэгээд би тавдугаар сарын 7-ны өдөр “Модун Шаньюй” ки­ноныхоо материалыг тэнд өгчихөөд явж байгаад баригдаж, ганц худагт гур­ван сар хоригдсон. Энэ хуга­цаанд нөгөө уралдаанд манай кино шалгараад, 220 сая төгрөгний тэтгэлэг улсаас авах ёстой болсон юм билээ. Ингээд тухайн үед сайд байсан Ё.Отгонбаярын тушаал гарсан байдаг.

Тэгээд би наймдугаар сарын 6-нд батлан даалтад гарч ирээд энэ уралдаанд шалгарснаа мэдээд хөө­цөлдөөд явахад БСШУЯ байхгүй болоод ССАЖЯ байгуулагдаж хөл толгой нь мэдэгдэхгүй байсан.

Тэгэхэд надад “Хариуц­сан газрын дарга чинь томилогдоогүй байна. Томи­логдохоор наад асуудлаа ярь гэсэн. Ингээд Н.Оргил гэж хүн үүрэг гүйцэтгэгчээр томи­логдсон.

Гэтэл тэр хүн “Чи гэмт хэрэгт холбогдсон юм байгаа биз дээ. Юу солиороод байгаа юм. Энэ тендер хүчингүй” гэсэн хариулт өгсөн. Шүүхээс намайг гэм буруутайг тогтоогоогүй бай­хад гэм буруутайд тооцох ёсгүй шүү дээ. Гэтэл одоо энэ хэрэг нь цагаадчихлаа.

-Тэгвэл та мөнгөө олж авах ёстой юм биш?

-Энэ тендерийн асуудлыг хэн, хэзээ хүчингүй болго­чихов. Тэр төсөвлөгдсөн 220 сая төгрөг хаачив гэдэг асуудлаар мөн АТГ, ШӨХТГ, ССАЖЯ-ны сайд, Төрийн нарийн бичгийн дарга, шинээр томилогдсон газрын дарга нарт албан ёсоор хариу өгнө үү гэсэн хүсэлт явуулж байгаа.

Эх сурвалж: