Европын Холбоо /ЕХ/ ОХУ-д хориг арга хэмжээ авна хэмээн сүрдүүлж эхэлсэн. Мэдээж хэрэг тэд үүнийг хүсээгүй. Зөвхөн АНУ-ын шахалт дор тэдний амнаас хориг арга хэмжээ хэмээх үг гарч байгаа юм.

Учир нь европчууд Оросоос авч буй байгалийн хийгээр дулаан хонож чаддаг. Мөн ЕХ-ны эдийн засгийн гол түнш бол ОХУ гэдэгтэй маргах аргагүй билээ.

Харин энэ үед Б.Обама өөрийн байр суурийг дорнын буюу Азийн орнуудаар дэмжүүлэхээр чармайж байна. Тухайлбал, Ерөнхийлөгч Б.Обама Хятад улсын дарга Си Зиньпинтэй утсаар холбогдож дэмжлэг авахаар ятгасан боловч үр дүнд хүрсэнгүй. Хятад өрнийн орнууд Оросыг шахалтад оруулж байгааг таашаахгүй байгаа юм.

Си Зиньпин Б.Обамад хандаж, “Хятад улс Украины асуудалд объектив бөгөөд шударга байр суурьнаас хандаж байгаа. Асуудалд оролцогч талууд илүү шударга байж нөхцөл байдлыг даамжруулахаас сэргийлэх хэрэгтэй” гэж хэлсэн байна. Украины асуудлыг улс төр гадаад харилцааны аргаар шийдвэрлэх хэрэгтэй гэсэн Си Зиньпины байр суурь ОХУ-тай ижил байна гэж ОХУ-ын Думын төлөөлөгч хэлсэн юм.

Хятадын удирдлага ОХУ-д авч байгаа дарам шахалтыг дэмжихгүй байгаагаа болгоомжтойгоор илэрхийлж байгаа. Харин тус улсын хэвлэл мэдээллийн хэрэгслүүд илүү идэвхтэй байр сууриа илэрхийлж байна. Хятадын төв мэдээний “Синхуа” агентлагаас “Өрнийн орнуудын балмад хувиа хичээсэн үйлдлийн улмаас бас нэгэн улс задран унаж байгааг Украины жишээнээс харж байна” гэж мэдээлэв. Түүнчлэн Украин дахь өөрийн үндсэн эрхийг эдлэх гэсэн ОХУ-ын үйлдлийг барууны орнууд хэтэрхий дэвэргэж байна гэж мэдээлсэн юм.

Хятадаас гадна Энэтхэг улс АНУ-ыг дагаж Орост авч буй хориг арга хэмжээнд нэгдэх гэж яарахгүй байна. Энэтхэгийн үндэсний аюулгүй байдлын албанаас “ОХУ Украинд өөрийн хууль ёсны эрхийн дагуу үйлдэл хийж байгаа” гэж мэдэгдсэн юм. Тус улсын улс төр нийгмийн судалгааны байгууллага, судлаачид ч Хятадын хэвлэлүүдийн адил Оросыг дэмжиж буй өөрсдийн байр сууриа идэвхтэй илэрхийлж байна. Тухайлбал, Жакартын их сургуулийн Олон улс судлалын сургуулийн Орос, Төв Ази судлалын төвийн захирал Нэру Муханти: “Өрнийн орнууд өөрсдийн геополитикийн эрх ашгийн үүднээс Украины хууль бус засгийн газрыг дэмжиж байна. Тэдний зорилго бол Орос Украины харилцааг муутгаж, улмаар ОХУ-ын хүч нөлөөг олон улсын түвшинд унагах явдал” гэж хэлжээ.

БРИКС-ын гишүүн Энэтхэг, Хятад улсын Украины асуудлаар барьж буй байр суурь нь өрнийн орнууд ОХУ-ыг шахаанд оруулж чадахгүй гэдгийг харуулж байна. Харин ч ОХУ-ыг сүрдүүлж буй орон өөрөө цөөнх болох магадлалтай. Өнөөгийн дэлхийн эдийн засаг, геополитикийн төв өрнөдөөс дорно зүгт шилжиж байгаа. Энэ үед Украины зэрэг асуудлууд дорнын орнуудыг улам нэгдмэл цул болгож байна. ОХУ, Хятад, Энэтхэг зэрэг бүс нутгийн хамтрагч орнууд одоогийн олон улсын тогтолцоог шинэчилж, өрнийн орнуудын ноёрхлыг сааруулах хэрэгтэй гэдгийг улам бүр мэдэрч байна хэмээн ОХУ-ын Засгийн газрын төлөөлөгч Серегей Думин хэлсэн байна.

А.Цацралт

Монцамэ агентлаг