Баян-Өлгий аймгийн Цэнгэл сумын дөрөвдүгээр багийн нутаг, “Алтай таван богд” уулын  оргилд энэ сарын 13-ны өдөр авиралт хийгээд уруудаж байсан Уулын спортын олон улсын хэмжээний мастер, гавьяат тамирчин Ч.Болдбаатар ор сураггүй алга болоод зургаа хонож байна. Уг осол оройн 20.00 цагийн үед гарчээ. Түүний охин Б.Үүрцайх 35 км замыг явганаар хоёр хоног туулж, хамгийн ойрын айлд хэл дуулгасан талаар бид мэдээлсэн. Өдгөө 53 настай тамирчны нас барсан, эсвэл гэмтэж бэртсэн үү гэдгийг хараахан тогтоогоогүй, эрлийн ажил үргэлжилж байна. Осол болох үед Гавьяат тамирчин Ч.Болдбаатар охин Б.Үүрцайхтайгаа хамт явсан бөгөөд нуралт үүссэн учраас хавцал руу унасан байж болзошгүй гэдэг мэдээллийг охин нь өгч байгаа юм.

Баян-Өлгий аймгийн Онцгой байдлын алба хаагчид, Цагдаагийн хэлтсийнхэн нургийн иргэдээс бүрдсэн нийт 22 хүний бүрэлдэхүүн өнгөрсөн хоногуудад эрэн хайх ажиллагааг явуулсан ч олоогүй. Түүнчлэн Баян-Өлгий аймгийн уулчид болох ОУХМ Х.Агваанданзан, А.Жанарбек, Спортын мастер н.Баасансүрэн нар уулын хормойд очсон бөгөөд Хилийн цэргийн анги нэгтгэл ч мөн тэдэнтэй нэгджээ. Дээрх баг бүрэлдэхүүн хүчин мөхөсдөж, олохгүй тохиолдол гарвал Улаанбаатар хотоос Монголын шилдэг уулчид мэргэжлийн хүмүүсээс бүрдсэн баг бүрэлдэхүүн очихоор болсон. Төлөвлөсөн ёсоор өчигдөр дээрх хүмүүс замдаа гарсан бөгөөд өнөөдрөөс хайх ажиллагаагаа эхлэх юм