Боксын ДАШТ-нд У.Мөнх-Эрдэнэ, З.Энхзориг нарын хэн нь явах нь одоогоор тодорхойгүй байгаа. Учир нь улсын аваргаар З.Энхзориг алтан медаль хүртсэн бол чансаагаараа У.Мөнх-Эрдэнэ тэргүүлээд байгаа юм. Харин боксын холбоо хоёр тамирчны дунд сорилго явуулж байж шийднэ гэсэн ч У.Мөнх-Эрдэнэ олон улсын хамтарсан бэлтгэлд яваагүй учраас сорилгод орохоос татгалзаад байгаа. Боксын холбооны Ерөнхий нарийн бичгийн дарга П.Сэрдамбын хэлснээр бол тухайн жилийн улсын аваргад түрүүлсэн тамирчин гадаадад болж байгаа бүх уралдаан тэмцээнд эх орноо төлөөлөн оролцдог гэж буй.

Д.Банди багшийнхаа удирдлага дор байсан хоёр шавь нь түүнийг дасгалжуулагч байхад хоёр өөр жинд хүч үздэг байсан ч одоо нэг жинд өрсөлдөгчид болсон аж. Тэдний багш Д.Банди хэлэхдээ “У.Мөнх-Эрдэнэ 2000 онд миний гараас явсан даа. Харин 2005 оны тавдугаар сарын 14-нд шигшээ багийн дасгалжуулагч болохоор сонгогдоход миний хүү Мөнх-Эрдэнэ ахиад миний гар дээр ирсэн. Мөнх-Эрдэнэд зааж өгсөн хурд хүч, техник алга болчихсон байсан. Удалгүй сайхан сэргээд амжилт гаргаад эхэлсэн. Би энэ бүхнийг чамд яагаад яриад байгаа юм бэ гэхээр Мөнх-Эрдэнэ миний үгэнд орохоо болиод, өөр хүн рүү явдаг болсон. Зан ааш нь маш их эвдэрч амжилт нь буурч эхэлсэн дээ. Бадар-Ууган, Сэрдамба, Мөнх-Эрдэнэ, Энхзориг бүгдээрээ миний шавь. Монгол улсын түүхэнд байгаагүй амжилт гаргасан. Хоёр шавийнхаа хэнийг нь гэж дэмжих юм бэ. Би тэр хоёрын бэлтгэлийг ойрд хараагүй болохоор хэн нь сайн байгааг мэдэхгүй байна. Би хэрвээ хажууд нь байсан бол хэн, хэнийг нь аварга болгож чадна” гэжээ.

Ямартаа ч хоёр тамирчны дунд сорилго явуулж ДАШТ явах тамирчныг сонгох бололтой.