УИХ-ын сонгуульд МАН-аас Өвөрхангай аймагт нэр дэвшиж байсан Н.Төмөрхүү өөрийн гэсэн барилгын бизнес эрхэлдэг гэдгийг хүмүүс андахгүй биз ээ. УИХ-д нэр дэвшиж улс төрийн карьер хөөх гэсэн тэрбээр сонгуульд ялалт байгуулж чадаагүй бөгөөд барилгын бизнестээ үнэнч хэвээр үлдэхээр шийдсэн ч ээлжит барилга дээрээс нь хүн унаж нас баржээ. Тодруулбал, өнгөрсөн баасан гаригт Баянзүрх дүүргийн V хороо, Кино үйлдвэрийн ард байрлах “Happy town” хорооллын барилгын 16 давхраас аюулгүй ажиллагааг бүрэн хангаагүйн улмаас туслах ажилтан нь унаж амиа алджээ.

Эх сурвалжийн мэдээлж буйгаар талийгаач залуу оюутан бөгөөд энэ сарын 1-нд тус ажилд оржээ. Тэрбээр ээж, дүүтэйгээ гурвуулаа амьдардаг гэнэ. Осол гардаг өдөр үдийн цайндаа орчихоод 16.00-17.00 цагийн үед голын барилгын хамгийн дээд талын давхрын гадна талд подем (барилгын материал тээвэрлэдэг урсдаг шат) дээр ажиллаж байсан бөгөөд хавтан авах гэж байгаад барилга шат хоёрын дунд хий гишгэн, хөл алдсан юм байна.

Ер нь “Өндөр буянт” ХХК-ийн гүйцэтгэж байгаа барилгууд аюулгүй ажиллагаа хангаагүй улмаас ойр орчин, хүний амь насыг заналхийсэн барилгууд барьдаг. Жишээлбэл, тус компани Нийслэлийн Сүхбаатар дүүргийн дөрөвдүгээр хороо 149-р цэцэрлэгийн хашааг ховхолж авч байгаад метр хүрэхгүй зайд 17 давхар орон сууцны барилга сүндэрлүүлсэн. Барилга барьж байх хугацаандаа кран цэцэрлэгийн дээвэр дээр унаж, мөн цэцэрлэгийн хүнсний агуулахын дээвэр дээр мод цөмрөн унаж, дулаан, цэвэр усны шугамыг төвтэй нь холбож цэцэрлэгийн шугам сүлжээн дээр барилгаа барьснаас болж газраар шугам сүлжээ рүү хүйт орж хөлдөж байсан юм. Энэ байдалтай нь цэцэрлэгийнхний зүгээс маргаан үүсгээд байсан ч тусыг эс олсон гэдэг.

Энэ мэтээр барилгынхаа бизнесийг өргөжүүлсээр байх уу Н.Төмөрхүү захирал аа.

Эх сурвалж: Шуурхай.мн