Ойрын өнгөрсөн өдрүүдэд ихэнх нутгаар түр зуурын усархаг бороо орсны улмаас нийслэлийн орчмын Туул гол үерлэж, аюултай түвшинд хүрээд байна.

Болзошгүй үер, усны аюулаас урьдчилан сэргийлэх ажлыг зохион байгуулах тухай Нийслэлийн Онцгой комиссын 03 тоот албан даалгаврын дагуу хэрэгжилтийг ханган ажиллаж байна.

Нийслэлийн Онцгой байдлын газар, цагдаагийн газрын хамтарсан завьт эргүүл өдөр бүр Баянзүрх дүүргийн 20 дугаар хороо, Хар усан тохойгоос Хан-Уул дүүргийн 12 дугаар хороо, Сонгины амралт хүртэл голын эрэг дагуу иргэдийг голын усанд осолдохоос урьдчилан сэргийлэх арга хэмжээг авч ажиллаж байна.

Холбогдох байгууллагаас цаг агаарын болон ослын талаарх сэрэмжлүүлгийг хэвлэл мэдээллийн байгууллага болон бусад хэлбэрээр тогтмол хүргэж байгаа. Гэвч иргэдийн санамсар болгоомжгүй, аюулгүй байдлаа хангадаггүй, гарц гарамгүй газраар гол гатлах гэж оролддог, согтууруулах ундаа хэрэглэсэн үедээ гол ус руу ордог байдлаас үүдэн голын усанд осолдож амь насаа алдах явдал гарсаар байна.

Мөн завьт эргүүл хийж байхад голын эрэг дээр байна насны хүүхдүүд олноор өдрийг өнгөрүүлж байгаа нь эцэг эхчүүд бага насны хүүхдэд хараа хяналт тавихгүй байгааг харуулж байна.

Иймд амарч зугаалж байгаа иргэд өөрсдөө аюулгүй байдлаа хангаж үерлэсэн голын усанд орохгүй байх, баталгаат зам гүүрээр зорчиж бага насны хүүхдийг тодорхой хариуцах хүнгүйгээр гол усруу явуулахгүй байхыг нийслэлийн Онцгой байдлын газраас онцгойлон сэрэмжлүүлж байна.