УИХ-ын гишүүн Ё.Отгонбаяр дөнгөж сая МҮОНРТ-ийн “Цагийн хүрд” мэдээллийн хөтөлбөрөөр буюу 20.00 цагт мэдээлэл өглөө. Сануулахад, О.Эрдэнэсолонгын нэрийн дансаар их хэмжээний буюу 323 сая ам.доллар, 13.9 тэрбум төгрөг байршсан болохыг цагдаагийнхан илрүүлсэн бөгөөд хуулийн дагуу мөрдөн шалгах үйл ажиллагаа үргэлжилж байгааг албаныхан хэлж буй. Ё.Отгонбаяр сайдын мэдээллийг хүргэе.

-Таны эхнэрийг баривчилсан талаар ямар мэдээлэлтэй байна вэ?

-Миний хувьд хэвлэл мэдээллийн хэрэгслээр гарч байгаатай ижил мэдээлэлтэй байна. Хөрөнгө орлогын мэдүүлэгтээ өөрийн болон гэр бүлийн дансанд байдаг бүх мөнгөн дүнгээ бичсэн байсан. Нийт хадгаламжийн мөнгөн дүн нь 300 гаруй сая төгрөг байгаа. Х.Тэмүүжин сайд мөн ярилцлага өгөхдөө саяыг тэрбум гэж андуурсан байж магадгүй гэж хэлсэн байсан. Өөрийнх нь  хадгаламжийн дэвтэр, мөнгөн дүн гээд бүгд ил байсан. Яагаад заавал баривчилж, хорих байсныг нь ойлгохгүй байна. Орлого, зарлага нь бүгд тодорхой байгаа.

-Энэ мөнгөний хэмжээ нь дөрвөн жилийн хугацаанд энэ дансанд орж гарсан мөнгө гэсэн.Таны эхнэр ямар бизнес эрхэлдэг вэ?

-Манай эхнэр хүнс, аялал жуулчлалын чиглэлээр бизнес эрхэлдэг. Ийм бизнест ийм их хэмжээний мөнгө байхгүй нь ойлгомжтой. 300 сая ам.доллар гэдэг бол улсын төсөвтэй тэнцэхүйц мөнгө хувь хүний дансаар орж гарна гэдэг бол байж болохгүй зүйл. Хэрэв төгрөгийг ам.доллартай андуурсан гэвэл би гомдолтой байна. Миний эхнэр ч гэсэн Монгол Улсын иргэн. Нэг албан тушаалтан мөнгөн дүнг андуурч хэлсний төлөө нэг иргэнийг хорих, цагдана гэдэг бол байж болохгүй зүйл.

-Энэ хэрэг иргэн О.Эрдэнэсолонготой холбогдсон. Гэтэл явсаар таны сайд байх үеийн цаг үетэй холбогдоод байна гэж хүмүүс ойлгоод байх шиг?

-Намайг шалгаж болно. Би шалгуулахад бэлэн. Миний эрхэлж байсан ажилтай холбоотойгоор ямар нэг зөрчил гарсан бол шалгаад, надаас байцаалт аваад, шалгах хэрэгтэй. Улсын төсвөөс ашигласан хэрэг байсан бол намайг бүтэн жилийн турш шалгаж байгаа. Ашигласан бол хорьж, цагдах байсан.

-Ерөнхийлөгчийн сонгууль болох гэж байгаатай холбогдоод улстөржөөд байна уу гэсэн хардлага яваад байна?

-Ерөнхийлөгчийн сонгууль болж байгаатай холбоотойгоор улс төр орж байна. Гэхдээ бохир улстөр явж байна, шалгагдаад тогтоогдох байх. Миний хань 300 сая ам.доллар битгий хэл нэг сая ам.доллар ч үзээгүй хүн. Хүүхдүүдийн нэр дээр байдаг мөнгө гээд бүх хөрөнгө нь 300 сая төгрөг.

-Эхнэртэйгээ албан ёсоор уулзах хүсэлт гаргасан гэсэн. Хариу өгөөгүй байна уу?

-Би урьд шөнө хөдөөнөөс ирсэн. Тиймээс өнөөдөр албан ёсоор эхнэртэйгээ уулзах хүсэлт гаргасан. Одоогоор хариу өгөөгүй байна. Би шүүхэд гомдол гаргасан. Яагаад гэвэл хэд хэдэн хууль ноцтой зөрчсөн байна. Хэдийгээр шалгаж байгаа ч гэсэн Монгол Улсын хууль хяналтын байгууллага хуулийн дагуу явах ёстой.

-Тодруулбал, ямар хууль зөрчсөн байна вэ?

-Сэжигтнээр тооцсон бол үндэслэл байх ёстой. Өөрийг нь хуурч, мэхэлж аваачсан. Баривчлах ажиллагаа нь оргон зайлахыг завдсан, мөрдөн байцаах  ажиллагаанд саад учруулсан, мэдүүлэг өгөх байсан гэх мэт үйлдлүүдэд баривчилдаг. Гэтэл шууд дуудаж аваачаад хорьсон байсан. Хадгаламжийн дэвтэрүүд нь  гэрт нь байхад аваачиж  тулгаагүй байсан.

-Цаашид хууль хяналтын байгууллага шалгаад мэдээлэл хийх байх. Та цаашдын үйл явцыг яаж харж байна вэ?

-Надтай холбоотой сэжиг байгаа бол намайг шалга. Би бэлэн байна. Хуулийн дагуу үйл ажиллагаагаа явуулаач гэж хүсч байна. Дуудахад нь очиж байхад цагдан  хорьж, баривчилна гэдэг буруу гэж бодож байна.